मड्रिड (एजेन्सी) – साविकको विजेता स्पेनिस क्लब रियल मड्रिडले यूईएफए च्याम्पियन्स लिग फुटबलमा आज राति रुसी क्लब भिक्टोरिया प्लेजेनको सामना गर्दैछ ।

रियल र भिक्टोरिया प्लेजेनबीचको खेल नेपाली समयअनुसार राति १२ः४५ बजेपछि सान्टियागो बर्नवेउमा हुनेछ । यो सिजन निकै खराव प्रदर्शन दोहोर्याई रहेको रियल भिक्टोरियालाई पराजित गर्दै पुनरागमनको प्रयासमा हुनेछ । यो सिजन रियलले १६ खेल खेलिसक्दा ६ खेल गुमाइसकेको छ ।

सेप्टेम्वर २२ मा स्पेनिस ला लिगामा इस्पान्योललाई १–० ले पराजित गरेयता रियलले जितको स्वाद चाख्न पाएको छैन । त्यसयता रियालले ५ खेल खेल्दा एट्लेटिको मड्रिडसँग गोलरहित बराबरी खेलेको थियो ।

ला लिगामा सेभिल्लासँग ३–०, अलाभेससँग १–० र लेभान्टेसँग शनिबार २–१ ले निराश बनेको थियो । च्याम्पियन्स लिगमा रुसी क्लब सिएसकेए मस्कोसँग रियल १–० ले स्तब्ध भएको थियो ।
यस्तो अवस्थामा रियलले भिक्टोरियालाई पराजित गर्दै पूनरागमन गर्ने योजनमा हुनेछ । यसै सिजन प्रशिक्षक जिनेदिन जिदान र क्लबका सर्वाधिक गोलकर्ता रोनाल्डोले क्लब छाडेसँगै रियल कमजोर देखिएको थियो । तर, सिजनको शुरुवातमा राम्रो प्रदर्शन गरेपनि रियलले त्यसलाई निरन्तरता दिन सकेको छैन ।

रियलसँगविश्व स्तरका गोलरक्षक, केलर नाभा, थिवाउट कोर्टुवा, सर्जियो रामोस, मार्सेलो, राफेल भरान, टोनी क्रुस, लुका मोड्रिच, क्यासमिरो, मार्काे एसेन्सियो, इस्को, बेल बेन्जेमा, लुकास भास्क्वेज र भेनेसियस जुनियरजस्ता खेलाडी रहेपनि रियलले अपेक्षाकृत प्रदर्शन गर्न सकिरहेको छैन ।

त्यसैले भिक्टोरियाविरुद्धको खेल रियलका अर्काे परीक्षा हुनेछ । भिक्टोरियाविरुद्ध जित हात पार्न सके प्रशिक्षक जुलियन लुप्टेगुईको जागिर जोगिने सम्भावना रहन्छ ।  यता लगातार खराव प्रदर्शन गरिरहेको रियललाई स्तब्ध पार्ने रणनीतिमा भिक्टोरिया हुनेछ ।

समूह ‘जी’ मा रियल २ खेलबाट तीन अंक जोडेर तेस्रो स्थानमा छ । दुई खेलबाटै १ अंक जोडेको भिक्टोरिया पुछारमा रहेको छ । आज राति नै इटालियन क्लब रोमाले शीर्ष स्थानमा रहेको रुसी क्लब सिएसकेए मस्कोसँग प्रतिस्पर्धा गर्दैछ । मस्को ४ अंक जोडेर शीर्ष स्थानमा रहँदा रोमा ३ अंक जोडेर तेस्रो स्थानमा रहेको छ ।