‘लोपेटेगुईमाथि हाम्रो पूर्ण विश्वास छ’ – रियल कप्तान रामोस

एजेन्सी – रियल म्याड्रिडका कप्तान सर्जियो रामोसले प्रशिक्षक जुलेन लोपेटेगुईमाथि टोलीले पूर्ण विश्वास गरेको बताएका छन् । लिगअन्तर्गत शनिबार लेभान्तेसँग घरेलु मैदानमा २-१ ले पराजित भएपछि रामोसले यस्तो अभिव्यक्ति दिएका हुन् ।

पछिल्लो ५ मध्य ४ खेलमा पराजित रियलका नवनियुक्त प्रशिक्षक लोपेटेगुई अहिले दबाबमा छन् । रामोसले लेभान्तेविरुद्ध खेलपछि प्रशिक्षकमाथि टोलीले विश्वास राखेको बताए । ‘ यो खराब लय म्याड्रिडका लागि राम्रो पक्कै होइन । लेभान्तेविरुद्ध तीन अद्ंक हासिल नगर्नु दुर्भाग्य थियो,’ उनले थपे, ‘ व्यक्तिगत गल्तीका कारण खेलमा अपेक्षित नतिजा नअाएपनि हामीले कसैलाई दोष लगाउन मिल्दैन । अहिले हामी एकतृत भएर प्रशिक्षकलाई साथ दिनुपर्छ ।’

‘लोपेटेगुईले पहिलो दिनदेखि नै हाम्रो हौसला बढाउने कार्य गरेका छन् । उनले हामीलाई एकतृत भएर अगाडी बढ्न सिकाएका छन् र हामी त्यसैलाई पछ्याउँदै हिँड्ने छौं,’ रामोसले भने ।

रियलको हारपछि बार्सिलोनाले सेभिल्लालाई ४-२ ले हराउँदै क्याटलान क्लबले ४ अंकको अग्रता बनाएको छ । रियल र बार्सिलोना अर्को साता एल क्लासिकोमा भिड्दैछन् । उक्त खेलमा बार्साका कप्तान लिअोनल मेसी भने उपस्थित हुने छैनन् ।