एजेन्सी – इंग्लिस प्रिमियर लिग अन्तर्गत शनिबार लिभरपुलले हडर्सफिल्ड टाउनलाई १-० ले पराजित गरेको छ । जितसँगै लिभरपुल अंक तालिकाको शीर्षस्थानमा रहेको म्यानचेस्टर सिटीसँग अंक बराबरी गर्न सफल भएको छ ।

मोहमद सलाहले खेलको २४ औं मिनेटमा गरेको गोल नै निर्णायक सावित भयो । जेर्डान शाकिरीले दिएको थ्रु बलमा गोल गर्दै सलाहले लिभरपुललाई अग्रता दिलाएका थिए । हडर्सफिल्डले पनि खेलमा पाएको मौका सदुपयोग गर्न सकेन । पहिलो हाफमै डिफेन्डर जोनाथन हगले प्रहार गरेको लामो प्रहार पोस्टमा लगेर फर्कनु टोलीको लागि दुर्भाग्य रहयो ।

लिभरपुल प्रशिक्षक जोर्गेन क्लोपले औसत खेल प्रदर्शनका बाबजुद जित हासिल गर्दा खुसी लागेको बताए । ‘ म आफ्नो प्रशिक्षण कालमा पहिलो पटक औसत खेल जित्दैछु । मलाई सामान्यतया उत्कृष्ट प्रदर्शनको जित मनपर्छ तर यस्तो जितको छुट्टै महत्त्व हुन्छ,’ उनले थपे, ‘ अन्तर्राष्ट्रिय ब्रेकपछि थुप्रै कारणले प्रदर्शनमा कमि आउँछ । यो जितले हामीलाई लय समात्न सहयोग गर्छ ।’

लिभरपुल अंक तालिकाको शीर्ष स्थानमा रहेको म्यानचेस्टर सिटीसँग बराबर अंकमा छ । गोलअन्तरमा पछाडी रहेकाले लिभरपुल दोस्रो स्थानमा छ । यता हडर्सफिल्ड भने जम्मा २ अंकसहित अंक तालिकाको पुछारबाट दोस्रो स्थानमा छ ।