एजेन्सी – फ्रान्सेली लिग वन अन्तर्गत शनिबार भएको खेलमा पेरिस सेन्ट जर्मेन (पीएसजी) ले एमिएन्सलाई ५-० ले पराजित गरेको छ । पीएसजीका लागि स्टार फरवार्ड नेयमार विश्राममा रहेका थिए ।

पीएसजीलाई लगातार दशौँ लिग खेलमा जित दिलाउने क्रममा डिफेन्डर मार्किन्होसले खेलको १२ औं मिनेटमा अग्रता दिलाएका थिए । उनले एन्जल डी मारियाको कर्नरमा हेडरमार्फत गोल गरेका थिए । डी मारियाकै पासमा पीएसजीको दोस्रो गोल पनि सम्भव भयो । उनले ४२ औं मिनेटमा एड्रीएन राबिओटको गोलमा पनि असिस्ट गरेका थिए ।

दोस्रो हाफ ८० औं मिनेटमा जुलियन ड्राक्सलरले गोल गर्दै पीएसजीलाई ३-० ले अगाडी बढाए । लगत्तै किलियन एमबाप्पेले पनि गोलकर्ताको सुचिमा आफ्नो नाम लेखाए । उनले मौसा डीयाबीको पासमा गोल गरेका थिए । डीयाबीले खेलको तीन मिनेट समय बाँकी हुँदा आफैं गोल गर्दै पीएसजीको जित पक्का गरे । डीयाबी डी मारियाको स्थानमा मैदान प्रवेश गरेका थिए ।

लिगमा लगातार १० जित दर्ता गरेसँगै पीएसजीले लिगमा आफ्नो अधिपत्य कायम राखेको छ । पीएसजीले १० खेलमा ३० अंक जोडेको छ । दोस्रो स्थानमा रहेको लिलले भने ९ खेलमा १९ अंक मात्र जोड्न सकेको छ । त्यसपछि १० खेलमा १७ अंक जोडेको लियोन तेस्रो स्थानमा छ । पीएसजीले लिगको सबै जितमा कम्तिमा पनि ३ गोल गरेको छ ।