एजेन्सी – इंग्लिस प्रिमियर लिग अन्तर्गत शनिबार भएको खेलमा म्यानचेस्टर सिटीले घरेलु मैदानमा बर्नलीलाई ५-० को फराकिलो अन्तरले पराजित गरेको छ ।

अर्जेन्टिनी फरवार्ड सर्जियो अगुएरोले खेलको १७ औं मिनेटमा सिटीलाई अग्रता दिलाएका थिए । उनले डेविड सिल्भाको पासलाई सदुपयोग गर्दै गोल गरे । बर्नलीले बिरलै आक्रमण गरेपनि रक्षात्मक रुपमा भने राम्रो प्रदर्शन गरेको थियो । सिटीका पूर्व गोलरक्षक जो हार्ट बर्नलीको गोलरक्षकको भूमिकामा थिए । उनलाई सिटीका समर्थकहरुले खेलअघि ताली बजाएर विशेष सम्मान समेत दिएका थिए ।

दोस्रो हाफमा सिटीले आक्रमणलाई थप बलियो बनायो । बर्नार्डो सिल्भाले सिटीका लागि ५४ औं मिनेटमा दोस्रो गोल गरे । उनलाई पनि डेविड सिल्भाले नै असिस्ट दिएका थिए । लगत्तै फर्नान्डीन्होले उत्कृष्ट गोल गर्दै सिटीलाई ३-० ले अगाडी बढाए । उनले कर्नरमा आएको रिबाउन्डलाई उत्कृष्ट ढंगले गोलमा परिणत गरेका थिए ।

रियाद माहरेजले पेनाल्टी क्षेत्र बाहिरबाट दर्शनीय गोल गर्दै सिटीलाई ४ गोलको अग्रता दिलाए । इन्ज्युरी समयमा लेरोय सानेले गोल गर्दै जित पक्का गरे । उनले बेन्जामिन मेन्डीको क्रसमा सहजै गोल गरेका थिए । यस जितसँगै सिटी अंक तालिकाको शीर्ष स्थानमा उक्लिएको छ । सिटीले ९ खेलमा २३ अंक जोडेको छ ।