एजेन्सी – इंग्लिस प्रिमियर लिग अन्तर्गत शनिबार चेल्सी र म्यान्चेस्टर युनाइटेडको खेल २-२ को बराबरीमा टुङ्गिएको छ । निकै प्रतिस्पर्धात्मक खेलमा चेल्सीका रस बार्कलीले दोस्रो हाफको इन्जुरी समयको अन्तिम मिनेटमा गोल गर्दै खेल बराबरीमा ल्याएका थिए ।

चेल्सीले खेलको पहिलो हाफमा अग्रता लिएको थियो । चेल्सीका लागि एन्टोनियो रुडिगरले पहिलो हाफमा गोल गर्दै अग्रता दिलाएका थिए । पहिलो हाफमा पछाडि परेको युनाइटेडले दोस्रो हाफमा पुनरागमन गर्ने सफल रह्यो । एन्थोनी मार्सियलले ५५ अौं मिनेटमा बराबरी गोल फर्काए ।

मार्सियलकै दोस्रो गोलमा युनाइटेडले अग्रता लियो । उनले मार्कस रासफर्डको पासलाई सदुपयोग गर्दै गोल गरेका थिए । खेल बराबरीतर्फ उन्मुख हुँदा अन्तिम समयमा चेल्सीले जीवनदान पायो । बार्कलीले इन्ज्युरी समयको अन्तिम मिनेटमा ६ यार्ड बक्सबाट सहज गोल गरे । युनाइटेडका गोलरक्षक डेविड डे हेयाले रुडिगरको हेडर बचाएर फर्केको बलमा बार्कलीले गोल गरेका थिए ।

बराबरी गोलपछि चेल्सीका सहायक प्रशिक्षकले युनाइटेडको बेन्च अगाडि खुसीयाली मनाउँदा केहिबेर तनावको स्थिति बनेको थियो । उनले प्रशिक्षक जोसे मोउरिन्होको अगाडी उनलाई उत्तेजित पार्ने कोसिस गरेपछि मोउरिन्हो उनीमाथि जाइलागेका थिए । यस घटनाबारे एफएमले छुट्टै छानबिन गर्न् सम्भावना रहेको छ ।

यस बराबरीसँगै चेल्सीले लिगमा अपराजित यात्रा कायमै राखेको छ । चेल्सी २१ अंक बोकेर लिगको शीर्षस्थानमा पनि पुगेको छ ‌।