म्यानचेस्टर (एजेन्सी)– म्यानचेस्टर युनाइटेडका प्रशिक्षक जोसे माउरिन्होले चेल्सीका स्ट्राइकर इडेन हाजार्ड म्यानेस्टर युनाइटेड आए आफूलाई खुसी लाग्ने बताएका छन् । उनले प्रिमियर लिग उपाधि दौडको नेतृत्व गर्ने क्षमता हाजार्डमा रहेको विश्वास पनि देखाएका छन् ।

हाजार्डले पनि मोउरिन्होसँग कम समय काम गर्ने अवसर पाएकोमा दुःखेसो गर्दै मौका मिल्दा पुन उनीसँग काम गर्ने इच्छा रहेको बताएका छन् । तर, तत्काल त्यसको सम्भावना देखिएको छैन । यी दुईबीच शनिबार (आज) स्टामफोर्ड ब्रिजमा भेट हुँदैछ । चेल्सी र म्यानचेस्टर युनाइटेड शनिबार प्रिमियर लिगमा एकअर्का विरुद्ध भिड्दैछन् ।

माउरिन्हो ओल्ड ट्राफोर्डमा दुई जनासँगै काम गर्नेमा आशावादी भने छन् । ‘इतिहासले भन्छ चेल्सी प्रिमियर लिग च्याम्पियन बन्दा हाजार्ड प्रिमियर लिगको उत्कृष्ट खेलाडी बनेको थिए । त्यो म हुँदा र अर्को पटक एन्टोनियो कोन्टे हुँदा,’ उनले भने, ‘अहिले चेल्सी लिगको शीर्षस्थानमा छ । किनकी उनी जस्ता खेलाडीले टोलीको प्रदर्शनमा निकै प्रभाव पार्छन् ।’

फुटबलमा थुप्रै अनुभवी र क्षमतावान मान्छेहरु चेल्सीमा रहेको मोउरिन्होको बुझाई छ । ‘मलाई लाग्छ उनीहरुले हाजार्डलाई युनाइटेडलाई बेच्दैनन् । त्यसमा कुनै आपत्ति छैन ,’ उनले थपे, ‘उनी राम्रो खेलाडी हुन् । हाम्रो सम्बन्ध पनि निकै राम्रो छ । हामीसँगै च्याम्पियन बनिसकेका छौं । उनी मेरो पालामा पहिलो पटक उत्कृष्ट खेलाडी बनेका थिए । त्यसैले हाम्रोबीचका अनुभव पनि स्मरणीय छ ।’

जारी लिगका ८ चरणका खेलको समाप्तीमा ३ टोलीको समान २० अंक छ । गोलअन्तरमा म्यानचेस्टर सिटी पहिलो, चेल्सी दोस्रो र लिभरपुल तेस्रो स्थानमा छ । पूर्व टोलीको सिजनको सुरुवातका विषयमा माउरिन्होले भने, ‘परिणामले नै सबै बोल्छ । अहिले उनीहरु च्याम्पियन्स लिग खेलिरहेका छैनन् । प्रिमियर लिगमा केन्द्रित छन्, उनले थपे, प्रिमियर लिगमा नतिजाले सबै बताएको छ। उत्कृष्ट नजितासहित उनीहरु माथिल्लो स्थानमा छन् ।’