एजेन्सी – इंग्लिस प्रिमियर लिग अन्तर्गत शनिबार म्यानचेस्टर युनाइटेड र चेल्सीबीच खेल हुँदैछ । चेल्सीको घरेलु मैदान स्टामफर्ड ब्रिजमा हुने खेलले शीर्ष स्थानको लडाईंमा निकै महत्त्व बोकेको छ ।

घरेलु टोली चेल्सीका लागि युवा मिडफिल्डरद्वय इथान अम्पाडू र हड्सन ओडोई चोटका कारण उपलब्ध छैनन् । माटियो कोभाचिच र एन्टोनियो रुडीगरपनि फिटनेसका कारण सुरुवाती ११ मा नपर्ने सम्भावना छ । प्रशिक्षक माउरिजियो सार्रीले गोलरक्षक केपासँगै सेजार एज्पिलीक्वेटा, डेविड लुइज र मार्कोस आलोन्सोलाई डिफेन्समा उतार्नेछन् । रुडीगर ठिक नभए केहिल अथवा क्रिस्टेन्सनले डिफेन्समा खेल्नेछन् ।

मिडफिल्डमा कान्टे र जोर्गीन्होको जोडीलाई कोभाचिचले साथ दिंदै आएका छन् । कोभाचिच ठिक नहुँदा सेस फाब्रिगासले उक्त भूमिका निर्वाह गर्नेछन् । आक्रमणमा विलियन र हाजार्डसँगै ओलिभिएर जिरुडले खेल्नेछन् । जारी सिजन हाजार्ड निकै उच्च लयमा छन् । उनलाई प्रशिक्षक सार्रीले पूर्ण स्वतन्त्रता दिएका कारण पनि प्रदर्शन सुधारिएको हो ।

यता जोसे मोउरिन्होको प्रशिक्षणमा रहेको युनाइटेडमा पनि फिटनेस समस्या छ । आन्देर हरेरा, मार्कोस रोजो, नेमान्जा माटिच र लुक शअ सुरुवाती रोजाइमा पर्ने नपर्ने फिटनेस स्थितिले बताउनेछ । पछिल्ला ६ खेलमा ३ हार बेहोरेको युनाइटेडको आक्रमण रोमेलु लुकाकुले सम्हाल्नेछन् । उनलाई एलेक्सिस सान्चेज र जुआन माटाले सहयोग गर्नेछन् ।

मिडफिल्डमा पल पोग्बाले नेतृत्व लिनेछन् । पूर्ण फिट भएमा माटिच र हरेराले उनलाई सहयोग पुर्याउने छन् । डिफेन्समा कप्तान एन्टोनियो भ्यालेन्सिया, क्रिस स्मलिङ, भिक्टर लिन्डेलफ र शअ छन् । गोलरक्षक डेविड डे हेया नै रहनेछन् ।

यी दुई टोलीबीच भएको पछिल्लो ६ खेलमा चेल्सीले ४ जित हासिल गरेको छ भने युनाइटेड २ पटक विजयी रहेको छ । युनाइटेड र चेल्सी पछिल्लो पटक एफए कपमा आमनेसामने भएका थिए । मे महिनामा भएको उक्त खेलमा चेल्सीका लागि इडेन हाजार्डले एकमात्र गोल गरेका थिए । हाजार्ड उक्त लयलाई आजको खेलमा पनि कायम राख्ने सुरमा हुनेछन् ।