एजेन्सी – स्पेनिस ला लिगा अन्तर्गत शनिबार हुने पहिलो खेलमा रियल म्याड्रिड र लेभान्ते भिड्दै छन् । लिगको शीर्ष स्थानमा पुग्न रियललाई घरेली मैदान सान्टियागो बर्नाबाउमा जित आवश्यक छ ।

पछिलो महिनादेखि चोटका कारण टोलीमा नरहेका फरवार्ड ग्यारेथ बेल प्रशिक्षणमा फर्किएका छन् । तर उनले पहिलो रोजाइमा स्थान बनाउने सम्भावना निकै कम छ । करीम बेन्जेमा र इस्को पनि चोटका कारण मैदानबाहिर नै रहनेछन् । प्रशिक्षक जुलेन लोपेटेगुईले मारियानो डियाजलाई मुख्य फरवार्डको रुपमा उतार्ने सम्भावना प्रबल छ ।

डियाजलाई लुकास भाज्केज र मार्को एसेन्सियोले साथ् दिनेछन् । डिफेन्समा ड्यानी कार्भाजाल चोटका कारण अनुपस्थित रहनेछन् । उनको स्थानमा नाचो फर्नान्डेजले राइट ब्याकमा खेल्नेछन् । रियलको लागि मार्सेलो चोटमुक्त भएर सुरुवाती ११ मा फर्कनु भने खुसीको खबर छ ।

यता लेभान्तेको टोलीमा भने चोटको नयाँ समस्या छैन । जारी लिग सिजनमा ३ गोल गरिसकेका ३१ वर्षीय फरवार्ड जोसे लुइस मोरालेसले आक्रमण सम्हाल्नेछन् । एनिस बार्धीले पनि आक्रमणमा स्थान बनाउन मिहिनेत गरिरहेका छन् । चोटका कारण लामो समय मैदान बाहिर रहेका अर्मान्डो सादिकु र कोके भने खेलमा उपस्थित रहने छैनन् ।

अघिल्लो सिजन रियल र लेभान्तेबीचको दुवै खेल बराबरीमा सकिएको थियो । सेप्टेम्बर २०१७ मा रियलको घरेलु मैदानमा भएको खेल १-१ को बराबरीमा सकिएको थियो । रियलले पछिल्लोपटक अक्टोबर २०१५ मा लेभान्तेलाई बर्नाबाउमा हराएको थियो । तर अक्टोबर २०१४ यता रियल लेभान्तेसँग पराजित भएको छैन । लेभान्तेले सन् २००७ मा रियललाई बर्नाबाउमा पराजित गरेको थियो ।

खेलको जानकारी

खेल : रियल म्याड्रिड विरुद्ध लेभान्ते

प्रतियोगिता: स्पेनिस ला लिगा

मिति: २० अक्टोबर २०१८, शनिबार

समय: नेपाली समयअनुसार दिउँसो ४:४५ बजे