एजेन्सी – झन्डै दुई साता लामो विश्राम पछि क्लब फुटबलको रौनक फेरी सुरु हुँदैछ । अन्तर्राष्ट्रिय खेल हुने ब्रेकमा राष्ट्रिय टोलीका लागि प्रतिनिधित्व गरिसकेर खेलाडीहरु आ-आफ्ना क्लबमा फर्किसकेका छन् ।

युरोपेली फुटबलमा यस साता केहि ठूला खेल हुँदैछन् । उपाधि दावेदार बीच हुने यी खेल सिजनको सुरुवातमै भएपनि दर्शकहरुको लागि रोमांचक हुनेछ । अन्तर्राष्ट्रिय ब्रेक सकिएलगत्तै हुने यी खेलले दर्शकहरुलाई भरपुर मनोरंजन प्रदान गर्नेछन् । यस साता हुने ४ ठूला खेल :

३. चेल्सी विरुद्ध म्यानचेस्टर युनाइटेड

जोसे मोउरिन्होको नेतृत्वमा रहेको म्यानचेस्टर युनाइटेडले शनिबार चेल्सीको घरेलु मैदान स्टामफर्ड ब्रिजमा खेल्दैछ । वर्तमान अवस्थामा दबाबमा रहेको मोउरिन्होले दुई पटक चेल्सीको जिम्मेवारी सम्हाल्दै दुवैपटक लिग उपाधि पनि जिते । युनाइटेडमा सोहि सफलता दोहोर्याउने उनको लक्ष्य सफल भएको छैन । यस सिजन क्लब इतिहासमै सबैभन्दा खराब सुरुवात गरेको युनाइटेड चेल्सीविरुद्ध लय समात्ने कोसिसमा हुनेछ । यता माउरिजियो सार्रीको प्रशिक्षणमा उत्कृष्ट प्रदर्शन गरेको चेल्सी शीर्ष स्थानमा पकड बलियो बनाउन लागि पर्नेछ ।

२. बार्सिलोना विरुद्ध सेभिल्ला

स्पेनिस लिगको शीर्ष दुई स्थानमा रहेका बार्सिलोना र सेभिल्लाबिचको खेल निकै प्रतिस्पर्धात्मक हुने अपेक्षा गरिएको छ । पछिल्लो समय लय समात्न असफल बार्सिलोना लिगको शीर्ष स्थानमा फर्कन सेभिल्लालाई घरेलु मैदान क्याम्प नोउमा पराजित गर्ने सुरमा हुनेछ । पछिल्ला खेलमा दबाब बनाएपनि सेभिल्ला अहिले राम्रो लयमा छ । शीर्ष स्थानमा अग्रता लिने टोलीलाई सुवर्ण मौका पनि छ । डिफेन्डर सिमोन केएरले त मेसी र बार्सिलोनाविरुद्ध सेभिल्ला कुनै हालतमा नडराउने अभिव्यक्ति नै दिएका छन् ।

१. इन्टर मिलान विरुद्ध एसी मिलान

इटालियन फुटबलको सर्वाधिक ठुलो डर्बी हो, मिलान डर्बी । कुनै समय पुरै युरोपको ध्यान तान्न सफल यस खेल पछिल्लो समय भने इटालियन फुटबलको अवसानसँगै केहि कम भएको छ । दुवै टोली एकै रंगशालामा खेल्ने भएकाले पनि यस खेललाई थप महत्त्वले हेरिने गर्छ । इन्टर मिलानले यो सिजन लिगमा राम्रो सुरुवात गरेको छ । फरवार्ड माउरो इकार्डीले पनि लय समातेका छन् । एसी मिलानले पनि पछिल्लो दुवै खेल जित्दै डर्बीअघि आफ्नो बलियो पक्ष देखाएको छ ।