एजेन्सी – अर्जेन्टिनी फरवार्ड गोन्जालो हिगुआइनले क्रिस्टियानो रोनाल्डो युभेन्ट्स आएपछि क्लबले उनलाई अन्यत्र लखेटेको बताएका छन् । गोन्जालो अहिले लोनमा एसी मिलानबाट खेलिरहेका छन् ।

 सन् २०१६ मा नेपोलीबाट ९ करोड युरोमा युभेन्ट्स आएका उनले दुई सिजनमा ४० लिग गोल गरेका थिए । क्लबले लिग उपाधिमा लगातार कब्जा जमाएपनि लक्ष्य बनाएको च्याम्पियन्स लिगमा भने अपेक्षित नतिजा हात पर्न सकेन । युभेले च्याम्पियन्स लिग जित्नका लागि नै रोनाल्डोलाई सिजनको सुरुवातमा भित्र्याएको थियो । यसैपनि बलियो रहेको युभेको टोली रोनाल्डोको आगमनपछि थप बलियो भएको हो ।

रोनाल्डोको आगमनपछि भने हिगुआइन टोलीका लागि वैकल्पिक फरवार्डको रुपमा आए । क्लबले उनलाई अन्य विकल्प खोज्न पनि लगायो । हिगुआइनले क्लबमै रहने इच्छा देखाएपनि उनी एसी मिलान पुगे । अहिले लोनमा रहेपनि सिजनको अन्त्यमा उनी स्थायी रुपमा मिलानको खेलाडी हुनेछन् । उनले क्लब छोड्ने इच्छा नराखेपनि क्लब छाड्नुपर्दा दुख लागेको बताएका छन् ।

‘मैले क्लब छाड्छु भनेको थिइन । कसैले पनि त्यस क्लब छोड्न चाहँदैन । मलाई क्लबबाट बाहिर निकालियो । म भाग्यमानी छु कि मैले मिलान जस्तो क्लब पाएँ । यहाँ आउने बितिक्कै मैले निकै सम्मान र माया पाएको छु,’ हिगुआइनले भने ।

‘ क्लबले एक्कासी रोनाल्डोलाई अनुबन्धन गर्यो । मेरो भूमिका उनी आएको दिन नै सकिएको रहेछ । मैले क्लबको लागि धेरै मिहिनेत गरें । उपाधि पनि जिताएँ,’ उनले थपे, ‘तर रोनाल्डो आएपछि क्लबले मलाई स्तर माथि उकास्ने भएका कारण अन्यत्र जान भन्यो । मेरो लागि मिलान आउनु नै उचित निर्णय भयो ।’

हिगुआइनले मिलानमा पनि राम्रो सुरुवात गरेका छन् । लिग तालिकामा क्लबको स्थान भने त्यति राम्रो छैन । ‘हामी ल्गिमा अझै माथि हुनुपर्ने टोली हौँ । त्यसबाहेक अन्य सबै पक्षमा म खुसी नै छु । व्यवसायिक र मानसिक रुपमा म मिलानमा ठिक छु । प्रशिक्षक जेनारो गाटुसोले पनि मलाई निकै सहयोग गरेका छन् ।’