एजेन्सी – कोलम्बियन मिडफिल्डर हामेस रोड्रीग्वेजलाई रियलले क्लब छाडेर जान दिनु गल्ति भएको र अब उनी फर्केर रियल नआउने कोलोम्बियाका लेजेण्ड कार्लोस भाल्लेरामाले बताएका छन् ।

२७ वर्षीय मिडफिल्डर हामेस सन् २०१७ जुलाईमा २ वर्षका लागि लोनमा जर्मन क्लब पुगेका हुन् । बायर्नसँग सिजनको अन्त्यमा ४ करोड २० लाख युरो तिरेर उनलाई क्लबमा स्थायी रुपमा अनुबधन गर्ने विकल्प पनि छ । क्लब र खेलाडीबिचमा सहमति भएको अवस्थामा बायर्नले उनलाई राख्न पाउनेछ ।

रियलमा तीन सिजन बिताउँदा हामेसले एक ला लिगा उपाधि र दुई पटक च्याम्पियन्स लिग उपाधि जिते । उनको प्रदर्शन पनि राम्रो रहेको थियो । तर रियलले हामेसलाई बायर्न जाने अनुमति दिएपछि उनले जर्मनीमा आफ्नो खेललाई थप सुधार गरेका छन् । रियलमा नियमित खेल्न नपाएका हामेस बायर्नमा खेल्न पाएका छन् ।

‘हामेस बायर्नमा खुसी छन् । उनी रियालमा फर्केर आउन चाहदैनन् । रियलको समस्या छाडेर अहिले उनी फुटबलमा रम्न थालेका छन्,’ भाल्लेरामाले भने । ‘रियलमा हामेसले निकै राम्रो सुरुवात पाएका थिए । धेरैले त्यस्तो अपेक्षा गरेका थिएनन् । मैले उनलाई लामो समयदेखि हेरेकाले उनले कस्तो खेल्छन् भन्ने थाहा थियो,’ उनले थपे ।

तर त्यसपछि रियलले हामेसलाई धेरै प्रयोग गरेन । हामेसलाई लोनमा पठाउन अन्य धेरै विकल्प थिए तर रियलले बायर्न नै रोज्यो । यसले गर्दा रियललाई नै च्याम्पियन्स लिगमा समस्या हुने सम्भावना रहन्छ । ‘ हामेसलाई छाड्नु रियलको गल्ति थियो । म्याड्रिडमा मात्र नभएर विश्वकपमा पनि आफूलाई सिद्ध परिसकेका खेलाडीलाई छाड्नु सहज निर्णय होइन,’ भाल्लेरामाले थपे ।

हामेसले बायर्नका लागि गत सिजन ३७ खेल खेल्दै ८ गोल गरे । लिग उपाधिसँगै टोली घरेलु कपको फाइनलमा पनि पुगेको थियो । सिजनको सुरुवातमा सुपर कप जितेको बायर्नका लागि उनले लिगका ७ मध्ये ६ खेल खेलेका छन् ।