एजेन्सी – पेरिस सेन्ट जर्मेनका गोलरक्षक जियानलुइजी बुफोनले युवा स्टार किलियन एमबाप्पे ब्यालोन डी’ओर उपाधिको हकदार भएको अभिव्यक्ति दिएका छन् ।

१९ वर्षीय एमबाप्पेले पीएसजीलाई गत सिजन तेहेरो उपाधि दिलाएका थिए । लगत्तै रुसमा भएको विश्वकपमा फ्रान्सलाई विश्व विजेता बनाउन उनले प्रभावकारी भूमिका खेले । यस सिजन पनि एमबाप्पेले आफ्नो लयलाई कायम राख्दै सबै प्रतियोगिताको ७ खेलमा १० गोल गरिसकेका छन् । उनले आफूलाई ब्यालोन डी’ओर उपाधिको दौडमा शीर्ष क्रममा नै राख्न सफल भएका छन् ।

यसै सिजनको सुरुवातमा पीएसजीसँग जोडिएका बुफोनले एमबाप्पेको दाँजो विश्व फुटबलका ठूला नामसँग गरिंदै आएपनि उनी विशेष रहेको बताए ।’ उनले मैदानमा देखाएको खेल हेर्दा नै थाहा हुन्छ । एमबाप्पे विशेष छन् । उनले विश्वकपमा त निर्णायक प्रदर्शन नै गरे , बुफोनले थपे, ‘ उनले ब्यालोन डी’ओर उपाधि जित्न लायक छैन भनेर कसैले भन्न सक्दैन । उनी उपाधिको हकदार नै हुन् ।’

‘इटालीमा पनि कुनै समय उनीजस्तै युवा प्रतिभा थिए । इटालीको खेलाडीको उदाहरण दिंदा उनलाई रोबर्टो बाजीयो, एलेसान्ड्रो डेल पिएरो र फ्रान्सेसको टोट्टीसँग दाँज्न सकिन्छ । तर उनको खेल्ने शैली र प्राविधिक पक्ष बिरलै देख्न पाइन्छ,’ बुफोनले भने, ‘उनी निकै नै विशेष छन् । आउने दिनमा अझै मिहिनेत गरेको खण्डमा एमबाप्पेले विश्व फुटबलमा छुट्टै छाप बसाउने छन् ।’

पीएसजीले लिग वन अन्तर्गत शनिबार एमिएन्सको सामना गर्दैछ । लिग तालिकामा पीएसजी शीर्ष स्थानमा फराकिलो अग्रता बनाउन सफल भएको छ ।