एजेन्सी – क्रोएसियाका कप्तान एवं रियल म्याड्रिड मिडफिल्डर लुका मोड्रीचले प्रतिष्ठित ब्यालोन डी’ओर उपाधिका लागि आफ्नो रोजाईको खेलाडीको नाम बताएका छन् ।

मोड्रीच आफैं पनि ३० खेलाडीको मनोनयनमा परेका छन् । उनले विजेताको नाममा आफ्नो नाम भन्न अस्विकार गर्दै उपाधि जित्न हकदार रहेका खेलाडीको नाम लिएका छन् । मोड्रीचले सेप्टेम्बरमा भएको फिफा थे बेस्ट अवार्डको उपाधि जितेका थिए । उनले क्रोएसियालाई विश्वकप फाइनलमा पुर्याउन र रियल म्याड्रिडको लगातार तेस्रो च्याम्पियन्स लिग उपाधिमा जिताउन महत्त्वपूर्ण भूमिका खेलेका थिए ।

अवार्डको आयोजक फ्रान्स फुटबलसँग बोल्दै मोड्रीचले फ्रान्सेली फरवार्ड एन्टोइन ग्रिज्मनलाई आफ्नो पहिलो रोजाईमा राखेका छन् । ‘ मेरो रोजाईमा ग्रिज्मन हुन्छन् । उनले जे हासिल गरेका छन् त्यो पक्कैपनि इर्ष्यागर्न लायक छ । उनी राम्रा खेलाडी पनि हुन्,’ उनले भने ।

मोड्रीचले एमबाप्पेबारे पनि एक उत्कृष्ट प्रतिभा भएको बताए । ‘एमबाप्पे अद्भुत प्रतिभा हुन् । उनले भविष्यमा के गर्छन् भन्ने अहिले नै संकेत देखिएको छ । उनले विश्वस्तरमा नै आफुलाई सिद्ध गरिसकेका छन् । उनी साँच्चै नै विशेष खेलाडी हुन्,’ मोड्रीचले थपे ।

उनले आफ्नोबारे भने खुलेर बोल्न चाहेनन् । ‘ म आफैंले उपाधि जित्न हकदार छु भने भन्न सक्दिन । मैले मैदानमा आफ्नो काम पुरा गर्नुपर्छ र त्यो मैले गदै आएको छु । सन् २०१८ मेरो करिअरकै उत्कृष्ट वर्ष भएको छ,’ उनले थपे ।

ब्यालोन डी’ओर को उपाधि डिसेम्बर ३ मा फ्रान्सको राजधानी पेरिसमा घोषणा गरिनेछ ।