एजेन्सी – फरवार्ड एन्टोइन ग्रिज्मनले दुई गोल गरेपछि फ्रान्सले एक गोलले पछाडी पारेको स्थितिलाई उल्टाउँदै यूईएफए नेसन्स लिगअन्तर्गत जर्मनीलाई २-१ ले पराजित गरेको छ ।

सन् २०१८ मा दोस्रो जितको खोजीमा रहेको जर्मनीले खेलको १४ मिनेटमा नै अग्रता लिएको थियो । प्रेस्नेल किम्पेबेले पेनाल्टी क्षेत्रभित्र ह्यान्ड गरेपछि रेफ्रीले दिएको पेनाल्टीमा टोनी क्रुसले गोल गरेका थिए । पहिलो हाफमा जर्मनीले १-० को अग्रता लिंदै लामो समयपछि जित दर्ता गर्ने संकेत दिएको थियो ।

दोस्रो हाफमा एन्टोइन ग्रिज्मनले दुई गोल गर्दै जर्मनीलाई लगातार हार चखाए । उनले ६२ औं मिनेटमा लुकास हर्नान्डेजको क्रसको सदुपयोग गर्दै हेडरमार्फत गोल गरे । त्यसको केहि समयमै फ्रान्सले पेनाल्टीको मौका पायो । ब्लेस माटुइडीलाई पेनाल्टी क्षेत्रभित्र लडाएपछि पाएको पेनाल्टीमा ग्रिज्मनले कुनै गल्ति गरेनन् ।

यस हारसँगै जर्मनीले सन् २०१८ मा छैटौं हार बेहोरेको छ । पछिल्लो खेलमा नेदरल्यान्ड्ससँग ३-० ले पराजित जर्मनीले सन् २००० पछि पहिलोपटक लगातार औपचारिक दुई खेलमा हार बेहोरेको हो । विश्वकपमा खराब प्रदर्शन गर्दै समूह चरणमा नै बाहिरिएको जर्मनीका प्रशिक्षक जोकिम लो अब थप दबाबमा छन् ।

नेसन्स लिगको समूहमा १ अंकसहित पुछारमा रहेको जर्मनीले नेदरल्यान्ड्सभन्दा एक खेल बढी खेलेको छ । टोली दोस्रो श्रेणीमा रेलिगेसन हुने सम्भावना पनि बढेको छ । पहिलो हाफमा राम्रो प्रदर्शन गरेपनि दोस्रो हाफमा लय गुमाउँदा जर्मनीले हार बेहोर्नुपरेको हो ।