एजेन्सी – फिफा वरियतामा विश्वविजेता फ्रान्ससँगै शीर्ष स्थानमा रहेको बेल्जियम घरेलु मैदानमा भएको मैत्रीपूर्ण खेलमा नेदरल्यान्ड्ससँग १-१ को बराबरीमा रोकिएको छ ।

खेलको पाँचौ मिनेटमा नै घरेलु टोली बेल्जियमले अग्रता नलिएको थियो । इटालियन क्लब नेपोलीबाट खेल्दै आएका फरवार्ड ड्रीज मर्टेन्सले टप कर्नरमा राम्रो गोल गरेका थिए । २७ औं मिनेटमा अर्नाउट ग्रोएनभेल्डले गोल गर्दै खेल बराबरीमा ल्याए ।

बेल्जियमले खेलको सुरुवाती समयमा एकपक्षीय दबाब राखेको थियो । इडेन हाजार्डलेको नेतृत्वमा बेल्जियमले गोल गर्ने अवसर पनि सिर्जना गरेको थियो । दोस्रो हाफमा भने प्रशिक्षक रोबर्टो मार्टिनेजले हाजार्डको स्थानमा उनका भाइ थ्रोगन हाजार्डलाई उतारे । रोमेलु लुकाकु र मर्टेन्सले पनि दोस्रो हाफमा विश्राम पाएका थिए ।

नेदरल्यान्ड्सका डिफेन्डर नाथन आकेले ७९ औं मिनेटमा गोल गर्ने अवसर पाए । तर उनको शक्तिशाली हेडरलाई सिमोन मिग्नोलेटले विफल पारे । तीन मिनेट समय बाँकी रहँदा बेल्जियमका मिसी बासुआईको प्रहार डच गोलरक्षक जास्पर सिलेसनले बचाए । म्यानचेस्टर युनाइटेडका पूर्व खेलाडी मेम्फिस डिपाएले पनि राम्रो प्रदर्शन गरेका थिए ।

पछिल्लो दुई मुख्य अन्तर्राष्ट्रिय प्रतियोगितामा छनोट हुन नसकेको नेदरल्यान्ड्स अहिले राम्रो लयमा छ । विश्व वरियतामा १७ औं स्थानमा रहेको डच टोलीले पछिल्लो ७ मध्ये १ खेलमात्र हारेको छ । नेदरल्यान्ड्सले अब नोभेम्बर १६ मा यूईएफए नेसन्स लिगको खेलमा विश्वविजेता फ्रान्सको सामना गर्नेछ ।