एजेन्सी – अन्तर्राष्ट्रिय मैत्रीपूर्ण खेलमा लगातार खराब प्रदर्शन गरिरहेको उरुग्वे लगातार दोस्रो खेलमा एसियाली टोलीसँग पराजित भएको छ । मंगलबारको खेलमा जापानले दक्षिण अमेरिकी उरुग्वेलाई ४-३ ले पराजित गरेको हो ।

जापानको जितमा टाकुमी मिनामिनोले दुई गोल गरे । हाजिमे मोरियासुलाई प्रशिक्षक नियुक्त गरेयता टोलीले तीन खेलमा तीन जित दर्ता गरेको छ । यता उरुग्वेले भने पाँच दिनको अन्तरमा एसियाली राष्ट्रविरुद्ध दोस्रो हार बेहोर्यो । शुक्रबार भएको खेलमा उरुग्वे दक्षिण कोरियासँग २-१ ले पराजित भएको थियो । जापानविरुद्ध निकै खराब प्रदर्शन गरेको उरुग्वे अझै बढी गोल खानबाट बचेको थियो ।

खेलको दशौं मिनेटमा मिनामिनोले सुरुवाती अग्रता दिलाएका थिए । ग्यास्टोन परेरोले पहिलो हाफको मध्यतिर खेल बराबरीमा ल्याए । शोया नाकाजिमाको प्रहारलाई उरुग्वेका गोलरक्षक फर्नान्डो मस्लेराले बिफल पारेपनि रिबाउन्डमा युया ओसाकोले गोल गर्दै जापानलाई पुन: अग्रता दिलाए ।

एडिन्सन कभानीले दोस्रो हाफको १२ औं मिनेटमा खेल फेरी बराबरीमा ल्याए । जापानका डिफेन्डर जेन्टा मिउराले गम्भीर गल्ति गरेपछि कभानीले ६० हजार दर्शक उपस्थित रंगशालालाई स्तब्ध बनाउँदै गोल गरेका थिए । जापानले केहि बेरमै अग्रता आफ्नो पक्षमा पार्यो । रित्सु दोआनले गोल गर्दै जापानलाई खेलमा तेस्रो पटक अगाडी बढाए । मस्लेराले दोआनको प्रहार रोक्न नसक्दा रिबाउन्डमा मिनामिनोले अर्को गोल थपेका थिए ।

वैकल्पिक खेलाडी जोनाथन रोड्रीग्वेजले ७५ औं मिनेटमा अग्रता कम गरे । तर उक्त गोल खेलको नतिजा परिवर्तन गर्न पर्याप्त रहेन । जापानले ४-३ को जित दर्ता गर्दै लगातार तेस्रो जित हात पार्यो । विश्वकपको राउण्ड अफ १६ सम्म पुगेको जापानले अब एसियन कपको तयारीमा आफ्नो बलियो दावेदारी प्रस्तुत गरेको छ ।

‘यसले हाम्रो एसियन कप लक्ष्यमा ठूलो सहयोग पुर्याएको छ । खेलाडीहरुले निकै मिहिनेत गरेका छन् र नतिजा पनि आएको छ । हामीले अझै पनि सुधार गर्ने धेरै ठाउँ छन् , ‘प्रशिक्षक मोरियासुले भने ।