एजेन्सी – साउदी अरेबियाको उत्तरी जेद्दाहस्थित किङ अब्दुल्लाह स्पोर्ट्स सिटीनामक रंगशालामा ब्राजिल र अर्जेन्टिना मैत्रीपूर्ण खेलमा आमनेसामने हुँदैछन् ।

ब्राजिलको सम्भावित ११ :

ब्राजिलका प्रशिक्षक टिटेलाई केहि पोजिसनमा टोली छनोट गर्न सहज निर्णय हुनेछ । तर केहि पोजिसन भने उनलाई टाउको दुखाइ नै बनेको छ । गोलरक्षकमा एलिसन र एडरसनमध्ये एकले खेल्नेछन् । पछिल्लो खेल एडरसन खेलेका कारण यस खेलमा एलिसनले मौका पाउने देखिन्छ ।

डिफेन्सको मध्यभागमा मिरान्डा र मार्किन्होस खेल्नेछन् भने साइड डिफेन्समा ड्यानीलो र मार्सेलो उत्रनेछन् । ब्राजिलले ४-३-३ को फर्मेसनमा खेल्दा मिडफिल्डको मुख्य जिम्मवारी क्यासेमिरोले सम्हाल्नेछन् । उनलाई आर्थर र फिलिपे कोउटिन्होले साथ दिनेछन् । आक्रमणमा नेयमारसँगै रिचार्लीसन र रोबर्टो फिर्मिनोले खेल्ने सम्भावना प्रबल छ ।

अर्जेन्टिनाको सम्भावित ११  :

अर्जेन्टिनाले इराकविरुद्ध ४-० को जित दर्ता गर्दा युवा र अनुभव कम भएका खेलाडीले मौका पाएका थिए । यस खेलमा गोलरक्षक सर्जियो रोमेरोले पोस्ट सम्हाल्नेछन् । डिफेन्सको मध्यभागमा निकोलस ओटामेन्डी र जर्मन पेज्जेलाले विपक्षी आक्रमण रोक्नेछन् । डिफेन्सको छेउमा रेंजो साराभिया र निकोलस टाग्लियाफिको उत्रनेछन् ।

रक्षात्मक मिडफिल्डको भूमिकामा लिआन्द्रो परेडेस हुनेछन् । रोड्रीगो बट्टाग्लिया र जिओभानी लो सेल्सोले मिडफिल्ड र फरवार्डको समन्वय गर्ने भूमिका खेल्नेछन् । आक्रमणमा माउरो इकार्डी नै एकल फरवार्डका रुपमा उत्रनेछन् । एन्जल कोर्रिया र पाउलो डिबालाले इकार्डीलाई साथ दिनेछन् ।

खेल नेपाली समयानुसार रातको ११:३० बजे सुरु हुनेछ ।