रोम (एजेन्सी)– पेरिस सेन्ट जर्मेन (पिएसजी) सँगको च्याम्पियन्स लिग खेलअघि नेपोलीका मुख्य प्रशिक्षक कार्लो एन्सेलोटीले पिएसजीका स्ट्राइकर केलियन एमबाप्पे भविष्यमा सुपरस्टार बन्ने बताएका छन् ।

फ्रान्सेली युवा सनसनीले पछिल्लो केहि सिजन यता उच्च प्रदर्शन गरिहेका छन् । केहि महिनाअघि रसियामा सम्पन्न विश्वकप उपाधि फ्रान्सलाई दिलाउन पनि उनले महत्वपूर्ण भूमिका निर्वाह गरेका थिए ।

फ्रान्सलाई विश्व कप दिलाउनका साथै पिएसजीबाट गत सिजन उच्च प्रदर्शन गरेका एमबाप्पले बालोन डि ओर २०१८ को मनोनयनमा समेत परेका छन् ।एमबाप्पले दमदार रुपमा नयाँ सिजनको सुरुवात गरेका छन् ।

सिजनका ७ खेलमा उनले १० गोल गरिसकेका छन् । जसमा २ गोल च्याम्पियन्स लिगमा गरेका हुन् । पिएसजीले च्याम्पियन्स लिगको अर्को खेलमा इटालियन पावर हाउस नेपोलीको सामना गर्नुअघि एन्सेलोटीले १९ वर्षे फरवार्डको तारिफ गरेका हुन् ।

‘उनी राम्रो खेलाडी हुन् । उनी तीब्र गतिका छन् । अरु पनि तीब्रगतिका खेलाडी छन्,’ एन्सेलोटीले भने,‘ उनी एकै समयमा तीब्र र प्रभावकारी हुन सक्छन् । अरु र उनमा यहि फरक छ ।’

एन्सेलोटीले एमबाप्पेलाई खतरनाक खेलाडीको संज्ञा पनि दिएका छन् । ‘प्रभावकारी छन् र खतरनाक पनि ,’ उनले थपे,‘ उनी एकदमै युवा छन् । आउने केहि वर्षमा उनी निश्चय पनि सुपर स्टार हुनेछन् ।’

च्याम्पियन्स लिगको समूह ‘सी’ मा लिभरपुल र पिएसजीको समाना अंक छ । २ चरणको खेल सकिदा एन्सेलोटीको टोली नेपोली ४ अंकसहित शीर्षस्थानमा रहेको छ । पिएसजी र लिभरपुलको समान ३ अंक छ ।