एजेन्सी – स्पेनिस महारथी रियल म्याड्रिडका कप्तान सर्जियो रामोसले इंग्ल्यान्डका कप्तान ह्यारी केन ला लिगामा आएपनि चम्कन सक्ने अभिव्यक्ति दिएका छन् ।

दुई पटक प्रिमियर लिगको गोल्डेन बुट जितिसकेका केनलाई पछिल्लो केहि सिजनयता रियल म्याड्रिडले पछ्याईरहेको छ । तर केनले भने टोटेनहम छाडेर कतै नजाने प्रष्ट पार्दै आएका छन् । क्रिस्टियानो रोनाल्डोले रियल म्याड्रिड छाडेपछि क्लबमा गोलको खडेरी नै परेको छ । रियलले पछिल्ला ४ खेलमा गोल नै गर्न सकेको छैन । यस्तो अवस्थामा केनको आगमन हुँदा रियललाई निकै फाइदा पुग्छ ।

यूईएफए नेसन्स लिग अन्तर्गत सोमबार स्पेन र इंग्ल्यान्ड भिड्दै छन् । खेलको पूर्वसन्ध्यामा आयोजित पत्रकार सम्मेलनमा स्पेनका कप्तान रामोसले विपक्षी कप्तानको प्रदर्शन र फर्मको प्रशंसा गरेका हुन् । ‘ केन एक शारीरिक रुपमा निपुण फरवार्डको ज्वलन्त उदाहरण हुन् । उनले आफ्नो शारीरिक बनावट र फुटबल स्किललाई उचित ढंगले प्रयोग गरेका छन् । उनले धेरै डिफेन्डरलाई छक्याएपनि मलाई भने त्यसो गर्ने छैनन्,’ रामोसले भने ।

‘इंग्ल्यान्ड टोलीमा केनसँगै अन्य खेलाडी पनि छन् । प्रिमियर लिग शारीरिक रुपमा निकै कठिन हुने भएकाले पनि इंग्लिस टोलीलाई फाइदा पुगेको छ । तर हामी पनि त्यसका लागि तयार छौं,’ कप्तान रामोसले थपे ।

रुसमा भएको विश्वकपमा ६ गोल गर्दै गोल्डेन बुट नै जितेका केनले राष्ट्रिय टोलीका लागि भने त्यसयता ६ खेलमा गोल गरेका छैनन् । क्लब स्तरमा लगातार गोल गर्दै टोलीलाई जित दिलाईरहँदा राष्ट्रिय टोलीमा भने सोहिअनुसार प्रदर्शन हुन सकेको छैन ।