एजेन्सी – यूईएफए नेसन्स लिग अन्तर्गत आइतबार राती इटालीले पोल्यान्डलाई १-० ले पराजित गरेको छ । यस पराजयसँगै ३ खेलमा १ अंक जोडेको पोल्यान्ड लिग ए बाट दोस्रो लिगमा झर्ने पक्का भएको छ ।

इटालीले प्रतियोगिताको पहिलो जित दर्ता गर्ने क्रममा मे महिनादेखि टोलीको जिम्मेवारी सम्हालेका प्रशिक्षक रोबर्टो मान्चिनीले पनि पहिलो औपचारिक जित दर्ता गरे । इटालीको जितमा मार्क बिराघीले खेलको दोस्रो हाफको इन्ज्युरी समयको दोस्रो मिनेटमा गोल गरेका थिए । यो उनको पहिलो अन्तर्राष्ट्रिय गोल पनि हो ।

पहिलो हाफमा दुई पटक अग्रता लिन पोस्ट बाधक बनेको इटालीले निकै राम्रो खेल प्रदर्शन गरेको थियो । जितसँगै इटालीले ३ खेलमा ४ अंक जोडेको छ । यता पोर्चुगलले भने २ खेलमा ६ अंक जोड्दै समूह विजेता बन्ने दावेदारी प्रस्तुत गरेको छ । इटालीले आइतबार गरेको प्रदर्शन पछिल्लो केहि वर्षयता सबैभन्दा राम्रो थियो । इटाली खराब प्रदर्शनका कारण विश्वकपमा छनोट भएको थिएन ।

‘हामीले खेलमा दबाब राख्यौं । पहिलो हाफमा नै अग्रता लिनुपर्ने थियो । तर त्यो सम्भव भएन । यदि खेल गोलरहित बराबरीमा सकिएको हुन्थ्यो भने हाम्रो लागि अन्याय नै हुन्थ्यो, प्रशिक्षक रोबर्टो मान्चिनीले भने,’ यो निकै राम्रो जित हो । हामीले अझै सुधार गर्ने ठाउँ छन् । हामीलाई अझै केहि समय चाहिन्छ ।’

पोल्यान्डले पोर्चुगलविरुद्ध पराजित टोलीबाट ६ खेलाडी परिवर्तन गरेको थियो । इटालीले भने युक्रेनविरुद्ध बराबरीमा रोकिएको टोलीलाई नै उतारेको थियो । पहिलो हाफमा जोर्गीन्हो र लोरेन्जो इन्सिगनेको प्रहार पोस्टमा लागेर फर्कंदा इटालीले अग्रता बनाउन सकेको थिएन । पोल्यान्डका गोलरक्षक वोजचिएक सेचेज्नीले पनि केहि राम्रो बचाउ गरे ।

भिडियो हेर्नुहोस :