एजेन्सी – युरो २०१६ को विजेता पोर्चुगलले अन्तर्राष्ट्रिय मैत्रीपूर्ण खेलमा आइतबार राती स्कटल्यान्डमाथि ३-१ को जित दर्ता गरेको छ ।

पहिलो हाफमा घरेलु टोली स्कटल्यान्डले बलियो चुनौती पेस गरेपनि दोस्रो हाफमा भने त्यस लयलाई कायम राख्न सकेन । पोर्चुगलले पहिलो हाफको अन्त्यतिर अग्रता लिएको थियो । हेल्डर कोस्टाले केभिन रोड्रीग्वेजको पासलाई सदुपयोग गर्दै पाहुना टोलीलाई अगाडी बढाएका थिए । पहिलो हाफ स्कटल्यान्डका लागि स्टिभन नेस्मिथले गोल गर्ने अवसर चुकाएका थिए ।

दोस्रो हाफको सुरुआतमै पनि स्कटल्यान्डले अग्रता लिने मौका गुमायो । मक्गिनको पासमा मक्केनाको हेडर पोस्टभन्दा थोरै टाढाबाट बाहिरियो । खेलको १५ मिनेट बाँकी छँदा रेनाटो सान्चेसको फ्रिकिकमा एडरले हेडर गोल गर्दै अग्रता दोब्बर पारे । त्यसलगत्तै ब्रुमाले पनि डिफेन्सको गल्तिको फाइदा उठाउँदै गोल गरे ।

इन्ज्युरी समयको अन्तिम मिनेटमा स्कटल्यान्डले सान्तवना गोल फर्कायो । मकाए स्मिथको पासमा नेस्मिथले गोल गर्दै अग्रता दुई गोलमा झारे । खेलमा दुवै टोलीले बलमा उत्तिकै पकड र गोल गर्ने अवसर सिर्जना गरेका थिए । स्कटल्यान्डको डिफेन्सले खराब प्रदर्शन गर्नु नै हारको मुख्य कारण बन्यो ।

स्कटल्यान्डका प्रशिक्षक एलेक्स मक्लिसको लागि यो पछिल्लो ८ खेलमा छैटौं हार हो । यस प्रदर्शनले उनको जागिर पनि धरापमा परेको छ । अब यूईएफए नेसन्स लिगको दुई खेलले नै उनको भविष्य निर्धारण गर्ने बुझिएको छ । लिग अन्तर्गत स्कटल्याण्डले अर्को महिना अल्बानिया र पोर्चुगलको सामना गर्नेछ ।

खेलको भिडियो हेर्नुहोस: