बार्सिलोना (एजेन्सी) – बार्सिलोनाका कप्तान लिओनेल मेसीलाई पेप गुआर्डीलाको टोलीमा समावेश गर्न म्यानचेस्टर सिटीले तीन गुणा बादी तलबको प्रस्ताव राखेको खुलासा भएको छ । मेसीले त्यसका बाबजुद बार्सिलोना छाडेर सिटी नजाने निर्णय गरे ।

मेसीले पछिल्लोपटक बार्सिलोनामा नयाँ सम्झौता गर्नुअघि सिटीले मेसीलाई सो प्रस्ताव गरेको थियो । क्लबले मेसीलाई बार्सिलोनाभन्दा तीन गुणा बढी तलब सहितको प्रस्ताव पनि राखेको थियो । तर ३१ वर्षीय मेसीले आफ्नो करिअर एकै क्लबमा रहने भन्दै सो प्रस्ताव नकारेका हुन् । म्यानचेस्टर सिटीका प्रमुख कार्यकारी खल्डून अल मुबारकले यसको खुलासा गरेका हुन् ।

‘हामीले गुआर्डीओलालाई मेसीसँग वार्ता गरेर तीन गुणा तलबको प्रस्ताव राखेका थियौं । तर मेसी बार्सिलोना नछाड्ने निर्णयमा अडिग रहे,’ मुबारकले भने । मेसीले २०१७ को नोभेम्बरमा नयाँ सम्झौता गरिसकेका छन् । उनको नयाँ सम्झौता सन् २०२१ सम्म रहनेछ । मेसीको रिलिज कलज ७ सय मिलियन युरो राखिएको छ ।

यता बार्सिलोनाका अध्यक्ष जोसेप मारिया बार्टोमेउले भने मेसी जिन्दगीभर बार्सामै रहने बताए । ‘ हामी हरेक सिजन मेसीको सम्झौता परिवर्तन गर्दै गएका छौं । उनले हरेक सिजन आफूलाई सुधारेका छन् । यो सत्य हो कि उनको करिअर बार्सिलोनामा अन्त्य हुनेछ, ‘ उनले भने । मेसीले हालसम्म क्लबका लागि ७ सय खेल खेलेका छन् ।