सोफिया (एजेन्सी) – युइएफए नेसन्स लिग फुटबलमा बुल्गेरिया र म्यासेडोनिया विजयी भएका छन् । बुल्गेरियाले साइप्रसलाई २–१ ले पराजित गरेको हो । बुल्गेरियाको घरेलु मैदानमा भएको खेलमा घरेलु टोलीले १–० ले पछि परेको अग्रता उल्ट्याउदै २–१ को जित निकालेको हो । अर्को खेलमा जिब्रालटारले अर्मेनियालाई १-० ले पराजित गर्दै ऐतिहासिक जित दर्ता गर्यो ।

बुल्गेरियाको जितमा किरिल डिस्पोडोभ र तोडोर नेडेलेभले गोल गरे । साइप्रसका ग्रिगरिस कास्टनोसले गोल गरे । घरेलु टोली खेलको ४१औं मिनेटमा पछि परेको थियो । आन्द्रियस आभरमको पासमा ग्रिगरिस कास्टनोसले गोल गरेको थियो । पहिलो हाफमा १–० ले पछि परेको बुल्गेरियाले दोस्रो हाफमा उत्कृष्ट प्रदर्शनसहित २ गोल गर्दै पुनरागमन जित निकनल्न सफल भयो ।

बुल्गेरियाका किरिल डिस्पोडोभले ५७औं मिनेटमा गोल गर्दै खेललाई १–१ गोलको बराबरीमा ल्याए । ६८औं मिनेटमा तोडोर नेडेलेभले गोल गर्दै बुल्गेरियाको जित पक्का गरे । जितपछि समूह तीनमा अपराजित रहेको बुल्गेरियाले ३ खेलबाट ९ अंक जोडेर शीर्ष स्थानमा रहेको छ । पराजित साइप्रस ३ अंकसहति तेस्रो स्थानमा छ । नर्वे २ खेलबाट ६ अंकसहित दोस्रो स्थानमा छ ।

शनिबार राति नै भएको अर्काे खेलमा म्यासेडोनियाले लिचेस्टाइनमाथि ४–१ को फराकिलो जित निकाल्यो । म्यासेडोनियाको फराकिलो जितमा एलेक्सान्दर ट्राज्सकोभिस्कीले २ तथा गोरान पान्डव र इजान अलिस्कीले गोल गरे । लेचेस्टाइनका सेहान यिल्डिजले गोल गरे । एकपक्षीय बनेको खेलमा म्यासेडोनियाले १०औं मिनेटमा एलेक्सान्दर ट्राज्सकोभिस्कीको गोलबाट अग्रता बनाएको थियो ।

३०औं मिनेटमा एलेक्सान्दर ट्राज्सकोभिस्कीले अर्काे गोल गर्दै अग्रता दोब्बर पारे । ३६औं मिनेटमा गोरान पान्डवले गोल गर्दै म्यासेडोनियाले ३–० को अग्रता दिलायो । त्यसको १ मिनेटपछि सेहान यिल्डिजले गोल गर्दै खेललाई पहिलो हाफमा ३–१ को स्थितिमा ल्यायो । ६७औं मिनेटमा इजान अलिस्कीले गोल गर्दै म्यासेडोनियालाई ४–१ को सहज जित दिलाए । जितपछि म्यासेडोनिया समूह ४ मा ९ अंक जोडेर शीर्ष स्थानमा रहेको छ । लिचेस्टाइन ३ अंक जोडेर दोस्रो स्थानमा रहेको छ । आयरल्यान्ड र डेनमार्कले गोलरहित बराबरी खेल्दै अंक बाँडे ।

अर्मेनियामाथि जित दर्ता गर्ने क्रममा जिब्रालटारले आफ्नो अन्तर्राष्ट्रिय फुटबल यात्राकै पहिलो औपचारिक जित हात पार्यो । यसअघि मैत्रीपूर्ण खेलमा २ जित हात पारेको जिब्रालटारको यूईएफएको औपचारिक खेलमा भने पहिलो जित हो । दोस्रो हाफमा जोसेफ लुइसले गरेको पेनाल्टी गोल निर्णायक सावित भएको थियो ।