मोनाको (एजेन्सी) – फ्रान्सेली क्लब मोनाकोले थिएरी हेनरीलाई मुख्य प्रशिक्षकको रुपमा अनुबन्ध गरेको छ । यसअघि बेल्जियम राष्ट्रिय टोलीका सहायक प्रशिक्षकका रुपमा काम गरेका हेनरीलाई मोनाकोले २०२१ जुन अन्त्यसम्मका लागि आबद्ध गरेको हो । 

फ्रान्सेली लेजेन्ड हेनरीले मोनाकोबाट सन् १९९४ देखि १९९९ सम्म ५ वर्ष खेल्दै लिग वोन उपाधि जिताउन मद्दत गरेका थिए । हाल लिग वोनमा पुछारबाट तेस्रो स्थानमा रहेको मोनाकोले यसै बिहिबारमात्र पूर्व प्रशिक्षक लियोनार्डो जर्डीमलाई बर्खास्त गरेको थियो । ‘मेरो प्रशिक्षण जीवन मोनाकोबाट सुरु गर्न पाउनुमा आफुलाई भाग्यमानी ठानेको छु’, आर्सनलका लागि कीर्तिमानी गोल गरेका हेनरीले बताए ।

युभेन्टस, बार्सिलोना र न्यूयर्कबाट पनि व्यावसायिक फुटबल खेलिसकेका हेनरीलाई इङ्ग्लिस क्लब एस्टन भिल्लाबाट पनि प्रशिक्षकको भूमिका निर्वाह गर्न प्रस्ताव आएको बताइएको छ । ‘मलाई अन्य अवसर पनि थिए तर मोनाको सधै मेरो मनमा रहेकाले मैले दोहोर्याएर सोच्नु परेन’, मोनाकोसँग आबद्ध हुने निर्णयबारे उनले भने ।

मोनाकोले यस सिजन १ खेल मात्र जितेको छ । लिगमा ९ खेल खेलेर ६ अंक मात्र रहेको मोनाकोले ५ खेलमा पराजय भोगेको छ भने च्याम्पियन्स लिगको दुवै खेलमा पनि पराजित भएको हो। मोनाकोले २०१७ मा लिगको उपाधि जितेको थियो ।