रियाद (एजेन्सी) – ग्याब्रिएल जेसस र एलेक्स सान्ड्रोले गोल गरेपछि अन्तर्राष्ट्रिय मैत्रीपूर्ण खेलमा पाँच पटकको विश्व विजेता ब्राजिलले साउदी अरेबियामाथि २–० को सहज जित निकालेको छ ।

साउदी अरेबियाको घरेलु मैदान किङ साउद युनिभर्सिटीमा शुक्रबार राति भएको खेलमा ब्राजिलले शुरुवातबाटै आक्रमण बुनेपनि गोल गर्न असमर्थ रह्यो । अग्रपङ्तिमा स्टार खेलाडीहरु नेयमार, फिलिपे कौटिन्हो र जेससलाई उतारेपनि ब्राजिलले साउदीको बलियो रक्षापङ्ति तोड्न हम्मे–हम्मे परेको थियो ।

तर, ४४औं मिनेटमा नेयमारको उत्कृष्ट पासमा जेससले क्लोज रेन्जबाट साउदीका गोलरक्षकलाई बिट गर्दै गोल गर्न सफल भए । बल पोजिसनमा पकड जमाएपनि ब्राजिलले दोस्रो गोलको लागि इन्जुरी समय कुुर्नुपरेको थियो ।

इन्जुरी समयको थप गरिएको छैटौ मिनेटमा एलेक्स सान्ड्रोले गोल गर्दै ब्राजिलाई २–० को जित दिलाए । नेयमारको कर्नरमा प्राप्त बललाई सान्द्रोले सहजै गोल गरेका थिए । त्यसअघि ८५औं मिनेटमा साउदी १० खेलाडीमा समेटिएको थियो । साउदीका गोलरक्षक अब्दुल लाजिज अल बिसीले डि–बक्स बाहिर बल समाएपछि रेफ्रीले भिडियो एसिस्टेन्ट रेफ्री (भिएआर)को सहायतामा रातो कार्ड देखाएका थिए ।

ब्राजिलले मंगलबार अर्काे मैत्रीपूर्ण खेलमा परम्परागत प्रतिद्वन्द्वी अर्जेन्टिनासँग प्रतिस्पर्धा गर्दैछ । यता एसियन कपको तयारीमा रहेको साउदीले इराकसँग मैत्रीपूर्ण खेल खेल्दैछ ।

खेलको हाइलाइट्स हेर्नुहोस :