सोल (एजेन्सी) – दक्षिण कोरियाले इतिहासमै पहिलो पटक उरुग्वेलाई पराजित गर्ने क्रममा शुक्रबार अन्तर्राष्ट्रिय मैत्रीपूर्ण खेलमा २-१ को जित दर्ता गरेको छ ।

कोरियाका स्टार फरवार्ड सन ह्युङ मिनले पेनाल्टी मिस गर्नका बाबजुद कोरियाले दक्षिण अमेरिकी टोलीलाई २-१ ले पराजित गर्यो । निकै प्रतिस्पर्धात्मक रहेको खेलको पहिलो हाफ गोलरहित बराबरीमा टुंगिएको थियो । तर ६५ औं मिनेटमा सबास्टियन कोआटेसले ह्वाङ उइ-जोलाई पेनाल्टी क्षेत्रभित्र लडाएपछि कोरियाले पेनाल्टी प्राप्त गर्यो ।

तर सनले प्रहार गरेको पेनाल्टी उरुग्वेका गोलरक्षक फर्नान्डो मस्लेराले बचाए । उक्त बचाउको रिबाउन्डलाई ह्वाङले गोलमा परिणत गर्दै कोरियालाई सुरुवाती अग्रता दिलाएका थिए । उरुग्वेका लागि माटियास भेचिनोले ७१ औं मिनेटमा बराबरी गोल गरे ।

कोरियाका लागि जुङ वु-योङले ११ मिनेट समय बाँकी छँदा गोल गरे । उनले ६४ हजार घरेलु समर्थक उपस्थित खेलमा गोल गर्दै आठौँ प्रयासमा उरुग्वेविरुद्ध जित दिलाएका हुन् । यसअघि दक्षिण कोरिया उरुग्वेविरुद्ध ६ खेलमा पराजित भएको थियो भएन एक खेल बराबरीमा सकिएको थियो ।

कोरियाले सन् २०१९ मा हुने एसियन कपको तयारीमा ध्यान दिइरहेको छ । टोलीले मंगलबार मैत्रीपूर्ण खेलमा पानामाको सामना गर्नेछ । यता सन् २०१९ मा कोपा अमेरिकाकै लक्ष्य लिएर तयारी थालेको उरुग्वेले भने अर्को एसियाली टोली जापानको सामना गर्नेछ ।