सिमरा

राष्ट्रिय लिगको उपविजेता नेपाल आर्मीमाथि सडनडेथमा ६–५ को सनसनीपूर्ण नतिजा निकाल्दै सिमरामा जारी सिमरा गोल्डकप फुटबल प्रतियोगिता–२०७२ को फाइनलमा प्रवेश गरेको छ ।

निर्धारित ९० मिनेट र थप गरिएको अतिरिक्त २० मिनेटमा दुवैतर्फबाट १–१ गोल भएपछि खेलको नतिजाको लागि ट्राइब्रेकरको साहारा लिइएको थियो ।

ट्राइब्रेकरमा ५–५ को बराबरी भएपछि सडनडेथमा हेटौंडाले नतिजा आफ्नो पक्षमा पार्दै फाइनलको यात्रा तय गरेका थिए ।

गत हप्तामात्र हेटौंडामा सम्पन्न अन्तर्राष्ट्रिय आमन्त्रण गोल्डकप फुटबल प्रतियोगितामा भोगेको पराजयको बदला हेटौंडेली टोलीले सिमरामा लियो ।

ट्राइब्रेकरमा हेटौंडाको तर्फबाट सुनिल बल, सञ्जय राजबाहक, भूपाल गुरुङ, रवि भण्डारी, विश्व अधिकारी र सुनिल बिकले गोल गरेका थिए । आर्मीको तर्फबाट जितेन्द्र कार्की, भरत खवास, रञ्जित धिमाल, दीपक गुरुङ र विकेश कुथुले गोल गरेका थिए ।

आर्मीका सन्तोष तामाङको प्रहार भने पोलमा लागेर फर्किएको थियो । खेलको दश मिनेटमा आर्मीले जितेन्द्र कार्कीको गोलबाट अग्रता लिएको थियो । उनले दशौं मिनेटमा हेटौंडाका डिफेन्डर मनोज बिष्टले आर्मीका टंक बस्नेतलाई लडाएबापत् प्राप्त पेनाल्टिमा गोल गरेका थिए ।

निर्धारित ९० मिनेट सकिन तीन मिनेट बाँकी रहेको अवस्थामा हेटौंडाले खेललाई बराबरीमा ल्याएको थियो । हेटौंडाका लागि विमल रानाले बराबरी गोल गरेका थिए । उनी खेलका म्यान अफ दी म्याच समेत घोषित भए ।

मोफासलको सर्वाधिक नगद पुरस्कार राशी भएको यस गोल्डकपको फाइनलमा हेटौंडाको प्रतिनिधित्व गरेको विजय युथले बीरगञ्ज–११ र रुपन्देही–११ बीचको विजेतासँग शनिबार बाराको सिमरास्थित रंगशलामा प्रतिस्पर्धा गर्नेछ  ।