काठमाडौं (हाम्रो खेलकुद) – सहिद स्मारक ए डिभिजन लिग अन्तर्गत बिहीबार भएको खेलमा नेपाल पुलिस क्लबले जावलाखेल युवा क्लबलाई १-० ले  पराजित गरेको छ।

पुलिसका लागि पहिलो हाफको ३२ अौं मिनेटमा अजित भण्डारीले गोल गरेका थिए । पुलिसले पेनाल्टी क्षेत्रबाहिर पाएको फ्रिकिकमा उत्कृष्ट टिमवर्कको नमुना प्रस्तुत गर्दै गोल गरेको हो । सुमन लामाले छोटो फ्रिकिक लिँदै तेज तामाङलाई पेनाल्टी क्षेत्रको दायाँतर्फ पास दिए । तेजले सोहि पासलाई फार पोस्टमा क्रस गरे जहाँ अजितले सहजै गोल गरे ।

त्यसअघि जावलाखेलका गोलरक्षक टिकेन्द्र थापाले पुलिसको दुई सुन्दर प्रयासलाई विफल बनाएका थिए । सुमन लामाले ६ यार्ड भित्रबाट गरेको प्रहार उनले रोकेका थिए । त्यसअघि हेम तामाङको लामो दुरीको प्रहार पनि उनले उत्कृष्ट डाइभ दिँदै रोके । जावलाखेल काउन्टर अट्याकमा गरेको अाक्रमणमा भर पर्दा पुलिसले बल पोसेसन राखेर लगातार दवाव सिर्जना गरेको थियो ।

दोस्रो हाफमा जावलाखेलले केहि सुधारिएको प्रदर्शन गर्यो । त्यस क्रममा जावलाखेलले बराबरी गर्ने मौकाको सदुपयोग गर्न सकेन । खेल एक घण्टा समयमा चलिरहँदा राकेश हमालले कर्नरमा प्राप्त हेडर पोस्टको दिशा दिन सकेनन् । ७५ अौं मिनेटमा पुलिसका अजितबाट वैकल्पिक खेलाडी सुमन डंगोलले बल खोसेपछि प्रज्वल थापामगरले पेनाल्टी क्षेत्रभित्र वन भर्सेस वनमा गोल गर्न सकेनन् ।

त्यसअघि पुलिसले पनि अग्रता बढाउने मौका गुमायो । सुमन लामाले पेनाल्टी बक्सको छेउबाट गरेको प्रहार सिधै गोलरक्षकको हातमा पुग्यो । ८० अौं मिनेटमा अभिषेक रिजालको लो क्रसमा सुमनले पेनाल्टी क्षेत्रभित्र बल छुन सकेनन् । त्यसै बललाई रवि पासवानले भरत शाहलाई पास दिएपनि भरतको प्रहार अाकाशीयो ।