काठमाडौं (हाम्रो खेलकुद) – साहिद स्मारक ए डिभिजन लिग अन्तर्गत बिहीबार नेपाल पुलिस क्लब र जावलाखेल युवा क्लबबीच लिगको पाँचौ खेल हुँदैछ । खेल सातदोबाटोस्थित एन्फा कम्प्लेक्सको मैदानमा दिउँसो ३ बजे हुनेछ ।

लिगका लागि नेपाल पुलिस क्लबले लामो समयदेखि तयारी गरिरहेको छ । पुलिसमा राष्ट्रिय टोली र उमेर समूहमा अन्तर्राष्ट्रिय सहभागिता जनाएका खेलाडीको बाहुल्यता छ । यसबाहेक ए डिभिजन खेलिसकेका खेलाडी पनि टोलीमा छन् । यता जावलाखेलले भने केहि युवा खेलाडी समेटेर टोली तयार पारेको छ । कागजी रुपमा हेर्दा पुलिसको टोली बलियो देखिन्छ । दिनेश राजवंशी, तेज तामाङ, सुमन लामा, अभिषेक रिजाल, अर्पण कार्की जस्ता नाम चलेका युवा खेलाडीले पुलिसलाई मजबुती प्रदान गर्नेछन् ।

के भन्छन् लिगबारे प्रशिक्षक ?

अनन्त थापा (प्रशिक्षक, नेपाल पुलिस क्लब)– लिगका लागि नेपाल पुलिस क्लब जहिले पनि तयार छ । पुलिस क्लब लिगको दावेदार टोली हो । हामीले लिगलाई मध्यनजर गर्दै २ महिनाअघिबाट प्रशिक्षण शुरु गरेका थियौं । टिममा यसपटक युवा खेलाडीले भरिएको छ । सबै २५ वर्ष मुनिका छन् । ४ वर्षपछि लिग हुनु राम्रो हो । प्रशिक्षकको रुपमा पनि लिग जित्न चाहन्छु । च्यान्पियन बन्ने लक्ष्य छ ।

नरेश थापा (सहायक प्रशिक्षक, जावलाखेल युथ क्लब)- हामीले लिगका लागि करिव दुई अघिबाट आफ्नै मैदानमा प्रशिक्षण थालेका थियौं । टिममा उमेर समूह र नयाँ खेलाडीको बाहुल्यता रहेको छ । लिगका लागि हामीले १९ खेलाडी मात्र अनुबन्ध गर्न सकेका छौं । स्ट्राइकिङ र मिडफिल्डमा केही समस्या देखिएको छ । यसलाई हामी सुधार्नेछौं । लिगमा हाम्रो लक्ष्य सातौ पोजिसन सम्म आउने रहेको छ ।