एजेन्सी – अन्तर्राष्ट्रिय मैत्रीपूर्ण खेल अन्तर्गत बुधबार राती इटालीलाई अर्को युरोपेली टोली युक्रेनले बराबरीमा रोकेको छ । निकै प्रतिस्पर्धात्मक खेलमा इटालीले अग्रता लिएपनि युक्रेनले खेल १-१ को बराबरी गर्न सफल रहेको थियो ।

इटालीले दोस्रो हाफको सुरुवातमै अग्रता लिएको थियो । युभेन्ट्सका फेडेरिको बर्नार्डेस्कीको शक्तिशाली प्रहार गोलरक्षक आन्द्रेइ प्याटोभले सम्हाल्न नसक्द इटालीले अग्रता लिएको थियो । त्यसको केहि मिनेटमै युक्रेनले बराबरी गोल फर्कायो । रुस्लन मालिनोभ्स्कीले कर्नरमा आएको बललाई पोस्टको दिशा दिंदै खेल बराबरीमा ल्याएका थिए । इटालीले थप मौका पाएपनि त्यसको सदुपयोग भने गर्न सकेन ।

इटालीले काग्लियारीका मिडफिल्डर निकोलो बरेल्लालाई डेब्यु दिएको थियो । तर आक्रमणमा फेडेरिकोसँगै नेपोलीका लोरेन्जो इन्सिगने र फिओरेन्टिनाका फेडेरिको चिएसाले अपेक्षित प्रदर्शन गर्न सकेनन् । खेलको सुरुवातदेखि दबाब कायम गरेपनि युक्रेनी गोलरक्षक प्याटोभले राम्रो बचाउ गरेका थिए ।

खेलअघि अगस्टमा जेनोआमा पुल खसेर दिवंगत भएका ४३ मानिसको स्मृतिमा विशेष कार्यक्रम आयोजना गरिएको थियो । खेलको ४३ औं मिनेटमा रंगशालाका सबैले एक मिनेट मौन धारण गरेर शान्तिको कामना गरेका थिए । साम्प्डोरियाको घरेलु मैदानमा भएको खेलमा आफ्नो खेलाडी करिअर यहीं बिताएका रोबर्टो मान्चिनीले पनि स्मृति सभामा सहभागिता जनाए ।

पछिल्लो पाँच घरेलु खेलमा इटालीले जित हासिल गर्न सकेको छैन । अब इटालीले यूईएफए नेसन्स अन्तर्गत खेलमा आइतबार पोल्यान्डको सामना गर्नेछ । युक्रेनले पनि चेक गणतन्त्रसँग मंगलबार खेल्ने कार्यक्रम रहेको छ ।