एजेन्सी – क्रिस्टियानो रोनाल्डोलाई एक अमेरिकी नागरिकले सन् २००९ मा बलात्कार गरेको आरोप आएसँगै फुटबल जगत स्तब्ध भयो । तर रोनाल्डोको वकिलले आरोपमा संलग्न सम्पूर्ण कागजात झुटो भएको दावी गरेका छन् ।

३३ वर्षीय रोनाल्डोले भेगासको होटेलमा क्याथरिन मायोर्गालाई दुर्व्यवहार नगरेको बताउँदै आएका छन् । यता मायोर्गाले भने रोनाल्डोले उनीमाथि आक्रमण गरेको आरोप लगाएकी छिन् । रोनाल्डोका वकिल पिटर क्रिस्टियान्सनका अनुसार रोनाल्डोले ‘स्पष्ट रुपमा सबै आरोप नकारेका छन्’ ।

जर्मनीको डेर स्पिगल पत्रिकाले घटनाको पहिलो पटक खुलासा गर्दा रोनाल्डोले उक्त समाचार गलत भएको र उक्त साप्ताहिक पत्रिकाविरुद्ध कानुनी कारवाही थाल्ने बताएका थिए । वकिलका अनुसार उक्त संचारमाध्यमले जिम्मेवारीपूर्ण ढंगले काम नगरी सहजै बदल्न सकिने कागजातहरुलाई आधार मानेर गलत समाचार प्रकाशित गरेको हो । स्पिगलका अनुसार ३४ वर्षीय मायोर्गाले उक्त घटनापश्चात लास भेगास पुलिसमा रिपोर्ट पनि लेखाकी थिइन् ।

सन् २०१० मा उनले रोनाल्डोसँग उक्त घटनालाई बाहिर नल्याउने सहमतिमा झन्डै ४ लाख अमेरिकी डलर लिएकी थिइन् । वकिलका अनुसार ‘सन् २००९ मा भएको घटना आपसी सहमतिमा भएको थियो’ र रोनाल्डो त्यसमै अडिग छन् । वकिलका अनुसार रोनाल्डोले सहमति भएको स्वीकारेपनि जुन कारणले सहमति भएको थियो त्यो भने यो प्रकृतिको नरहेको बताए ।