म्यानचेस्टर (एजेन्सी)– फ्रान्सेली मिडफिल्डर पाउल पोग्बा चर्चामा रहि रहने खेलाडी मध्येका एक हुन् । उनी फ्रान्स वा म्यानचेस्टर युनाइटेडका कप्तान पनि होइनन् । खेलाडीमा रहेको क्षमता, स्कील, प्रभावकारिता र नेतृत्वदायी भूमिकाका लागि कप्तान नै भइरहनु नपर्ने पोग्बाले बताएका छन् ।

फ्रान्सबाट अन्तर्राष्ट्रिय खेलका लागि पोग्बाले अहिले क्लब छाडेर निस्केका छन् । राष्ट्रिय टोलीका अन्य खेलाडीसँग भेट हुने समयमा सञ्चारकर्मीले सोधेको प्रश्नको जवाफ दिने क्रममा कप्तानी आफ्नो लागि महत्वपूर्ण नहुने बताएका हुन् । ‘मैले फ्रान्सको कप्तानी गर्नका लागि खेलेको होइन । टोलीबाट खेल्नु मेरो लागि सधै विशेष हुने गरेको छ,’ उनले भनेका छन्, ‘बोल्नका लागि कप्तान नै हुन पर्दछ भन्ने छैन । नेतृत्व सम्हाल्नका लागि आर्मब्यान्ड नै चाहिन्छ भन्ने छैन ।’

नेतृत्वकर्ताले जहिले पनि मैदानमै आफुलाई प्रमाणित गर्ने पोग्बाले बताएका छन् । ‘मैले देखेका वास्तविक नेताले धेरै बोल्न आवश्यक छैन’ , उनले भने, ‘उदाहरणका लागि पिर्लो त्यसको एउटा उदाहरण हुन् । उनी ड्रेसिङ रुपमा धेरै बोल्दैनथे । उनी मैदानमा आफुलार्ई प्रमाणित गर्थे । उनी वास्तविक नेता हुन् । आर्मब्यान्ड उनको लक्ष्य थिएन ।’

अन्तर्राष्ट्रिय मैत्रीपूर्ण खेल अन्तर्गत विश्वविजेता फ्रान्सले बिहीबार आइसल्यान्डसँग खेल्दैछ । त्यसपछि फ्रान्सले जर्मनीसँग अक्टुबर १६ मा यूईएफए नेसन्स लिगमा प्रतिस्पर्धा गर्नेछ ।