एजेन्सी – पछिल्लो एक दशक विश्व फुटबलमा लिओनेल मेसी र क्रिस्टियानो रोनाल्डोले वर्चस्व नै जमाए । व्यक्तिगत उपाधिमा अधिपत्य जमाएका यी दुई खेलाडीले आ-आफ्ना टोलीमा पनि उपाधिको ओइरो नै ल्याए ।

गोल गर्न माहिर यी दुई खेलाडीले अन्य खेलाडीले तोड्न नसक्ने थुप्रै कीर्तिमान कायम गरेका छन् । तर अझै केहि यस्ता कीर्तिमान छन् जुन एक अर्काले तोड्न बाँकी छ । मेसीले राखेका केहि यस्ता कीर्तिमान छन् जुन रोनाल्डोले तोड्न निकै गाह्रो पर्नेछ :

१. लिगको एक सिजनमा ५० गोल

मेसीले सन् २०११/१२ सिजनको ला लिगामा ३७ खेल खेल्दै ५० गोल गरेका थिए । प्रतिखेल १.३५ को औसतमा उनले अद्भुत प्रदर्शन गरे । रोनाल्डोले पछिल्लोपटक सन् २०१४/१५ को सिजनमा ३५ खेल खेल्दै ४८ गोल गरेका थिए । त्यसयता उनले लगातार सिजनमा आफ्नो गोलसंख्या बढाउन असफल रहँदै आएका छन् ।

२. लगातार ४ ब्यालोन डी’ओर

मेसीले सन् २००९ देखि २०१२ सम्म लगातार ४ ब्यालोन डी’ओर उपाधि जितेर कीर्तिमान कायम गरे । त्यसअघि सन् १९८३ देखि ८५ सम्म मिचेल प्लाटिनीले लगातार तीन उपाधि जितेका थिए । मेसी र रोनाल्डो दुवैले ५-५ पटक ब्यालोन डी’ओर जितेका छन् । रोनाल्डोले २०१३ र २०१४ तथा २०१६ र २०१७ गरेर लगातार दुई पटक भने दुई उपाधि जितेका छन् । यसपटक पनि मनोनयनमा परेका रोनाल्डोले उपाधि जित्ने सम्भावना कम छ ।

३. लगातार सिजनमा ६० + गोल

रोनाल्डो र मेसी दुवै खेलाडीले एकै सिजनमा ६० गोल गर्ने कीर्तिमान राखेका छन् । तर मेसीले लगातार दुई सिजनमा ६० गोल कटाउँदै बेग्लै कीर्तिमान राखेका छन् । उनले लगातार सिजनमा ६० गोल र ६१ गोल गरेका थिए ।

४. एल क्लासिकोमा सर्वाधिक असिस्ट

विश्व क्लब फुटबलमा सबैभन्दा प्रख्यात खेल हो एल क्लासिको । स्पेनी महारथी रियल म्याड्रिड र बार्सिलोनाबीच हुने यस खेलले विश्व फुटबललाई जगाउने गर्दछ । यस खेलमा लिओनेल मेसीले १४ पटक असिस्ट गरेका छन् । रोनाल्डोले भने ४ पटक मात्र गोलमा सहयोगी भूमिका खेलेका छन् । रियल म्याड्रिड छाडिसकेका हुनाले अब रोनाल्डोले यस रेकर्ड तोड्न असम्भव छ ।

५. एल क्लासिकोमा सर्वाधिक गोल

असिस्टझैं मेसीले एल क्लासिकोमा गोलको संख्यामा पनि वर्चस्व जमाएका छन् । उनले हालसम्म २५ गोल गरेका छन् । यता रोनाल्डो भने रियलबाट खेल्दा १७ पटक मात्र गोल गर्न सफल भए । अब इटालियन लिगमा गएका कारण रोनाल्डो एल क्लासिकोमा सहभागी हुने छैनन् ।