एजेन्सी – रियल म्याड्रिडका विंगर ग्यारेथ बेलले स्पेनको राष्ट्रिय टोलीविरुद्ध हुने मैत्रीपूर्ण खेलमा नखेल्ने भएका छन् । क्लबबाट खेल्दा बोकेको चोटका कारण उनी वेल्सको मैत्रीपूर्ण खेलमा उपलब्ध नहुने भएका हुन् ।

गत शनिबार रियल अलाभेससँग १-० ले पराजित हुँदा बेल खेलको ८० औं मिनेटमा घाइते भएका बेल त्यसलगत्तै परिवर्तन भएका थिए ।  ‘ बेलको खुट्टामा सामान्य चोट देखिन्छ ।  त्यसैले मैत्रीपूर्ण खेलमा हामी जोखिम लिन चाहन्नौं,’ वेल्सका प्रशिक्षक गिग्सले भने, ‘ हामी उनको चोटलाई नियमित हेरिरहेका छौं र अर्को खेल खेल्ने सम्भावना छ । ‘

बेलले सोमबार र मंगलबार भएको प्रशिक्षणमा भाग लिएका थिएनन् । उनले स्पेनविरुद्ध बिहिबार हुने मैत्रीपूर्ण खेल गुमाएपनि त्यसपछिको यूईएफए नेसन्स कपको महत्त्वपूर्ण खेलमा भने खेल्ने सम्भावना छ । वेल्स र आयरल्यान्ड मंगलबार खेल्दैछन् । स्पेनविरुद्ध खेलमा रियल म्याड्रिडका अधिकांश खेलाडी खेल्ने हुनाले बेलको उपस्थितिलाई विशेष रुपमा हेरिएको थियो ।

प्रशिक्षक गिग्सले आयरल्यान्डविरुद्ध बेल खेल्ने-नखेल्ने यकिन भन्न नसकिने बताए । ‘ अहिले उनी ५०-५० को स्थितिमा छन् ।  हामीले गत साता परिक्षण गर्दा उनको स्थिति सुधारिएको थियो ।  अब उनलाई खेलाएर समस्या थप बढ्न पनि सक्छ ।  त्यसैले अहिले नै खेल्ने वा नखेल्ने भन्न सकिन्न ,’ गिग्सले भने ।