काठमाडौं (हाम्रो खेलकुद) – साहिद स्मारक ए डिभिजन लिग अन्तर्गत आज (बुधबार) च्यासल युथ क्लब र मछिन्द्र क्लब भिड्दै छन् । खेल दिउँसो ३ बजे सातदोबाटोस्थित एन्फा कम्प्लेक्सको मैदानमा हुनेछ ।

लिगको पहिलो खेलमा दुवै टोली सकारात्मक सुरुवात गर्न चाहन्छन् । च्यासलका प्रशिक्षक राजुकाजी शाक्य जित दर्ता गर्दै सुखद सुरुवात गर्ने सुरमा छन् । यता मछिन्द्रका प्रशिक्षक धनेश्वर प्रजापति च्यासलबाट अंक खोस्नुलाई नै सफलता मान्ने पक्षमा छन् । दुवै प्रशिक्षकले छोटो समयको तयारी भएपनि राम्रो प्रदर्शन गर्ने अपेक्षा गरेका छन् ।

शीर्ष श्रेणी लिगमा च्यासलको यो पहिलो सिजन हो । गतवर्ष बी डिभिजन लिगको उपाधि जितेपछि च्यासल शीर्ष श्रेणीमा बढुवा भएको थियो । पहिलो सिजनको लागि नै च्यासलले खुलेर खर्च गरेको छ । च्यासल राष्ट्रिय टोलीका तीन सदस्यसहित घरेलु फुटबलमा नाम चलेका खेलाडी सम्मिलित छन् । विमल घर्तिमगर, देवेन्द्र तामाङ र हेमन्त थापामगरले टोलीलाई मजबुती दिनेछन् । गोलरक्षक दिनेश थापामगर, मिडफिल्डर अमिर श्रेष्ठ, डिफेन्डर विक्रम लिम्बूले टोलीलाई थप सहयोग पुर्याउने छन् ।

यता मछिन्द्रले भने युवा खेलाडीलाई प्राथमिकतामा राखेको छ । रेलिगेसन नहुने लिग भएकाले पनि थोरै अनुभवी खेलाडी उतार्दै क्लबले खर्च बचाएको भान हुन्छ । प्रशिक्षक प्रजापति आफैं पहिलो पटक शीर्ष क्लब हेर्दैछन् । यसअघी उनी यू-१८ लिगमा सहायक प्रशिक्षकको भूमिकामा थिए । बुधबार च्यासलले ए डिभिजनमा डेब्यु गर्दा उनको पनि डेब्यु नै हुनेछ ।

पढ्नुहोस प्रशिक्षक के भन्छन् :

च्यासलका राजुकाजी शाक्य – ‘राम्रो सुरुवात गर्नेछौं’ (यहाँ थिच्नुहोस्)

मछिन्द्रका धनेश्वर प्रजापति – ‘ बलियो च्यासललाई दबाब दिनेछौं’ (यहाँ थिच्नुहोस्)