काठमाडौं (हाम्रो खेलकुद) – साहिद स्मारक ए डिभिजन लिग अन्तर्गत बुधबार च्यासल युवा क्लब र मछिन्द्र क्लब भिड्दैछन् । दुई खेलपछि स्थगित भएको लिगको तेस्रो खेलसँगै लिग फुटबल सुचारु हुन लागेको हो ।

पछिल्लोपटक ए डिभिजन लिग हुँदा मछिन्द्रको टोली निकै बलियो थियो । लिगको पहिलो चरणमा छैटौं स्थान हासिल गरेको टोलीले सुपर सिक्समा उत्कृष्ट प्रदर्शन गर्दै उपविजेता नै बनेको थियो । यसपटक भने टोलीले युवा खेलाडी समेट्दै औसत टोली बनाएको छ । टोलीमा अनुभवी विशाल राई ‘ए’ सँगै केहि शीर्ष डिभिजनको अनुभव बोकेका खेलाडी समेटेको छ ।

प्रशिक्षक धनेश्वर प्रजापति पनि पहिलोपटक कुनैपनि स्तरमा सिनियर टोलीको प्रशिक्षण सम्हाल्दै छन् । उनले पहिलो खेलमा च्यासलविरुद्ध कुनै दबाबमा नरहने बताए । ‘हामी शत प्रतिशत दिएर खेल्नेछौं । च्यासलविरुद्ध छोटो समयको तयारी भएपनि राम्रो खेल्नेमा विश्वस्त छु । हामीले बलियो च्यासलविरुद्ध टोलीलाई हेरेर रणनीति बनाएका छौं,’ उनले भने ।

च्यासलले राष्ट्रिय टोलीका फरवार्ड विमल घर्तिमगर, मिडफिल्डर हेमन्त थापामगर र डिफेन्डर देवेन्द्र तामाङलाई टोलीमा समावेश गरेको छ । यसबाहेक टोलीमा विंगर अमिर श्रेष्ठ, गोलरक्षक दिनेश थापामगर लगायत घरेलु फुटबलमा चलेका नाम छन् । मछिन्द्रका प्रशिक्षक प्रजापति च्यासललाई दबाब हुने कारण त्यसको फाइदा उठाउने प्रयास गर्ने बताए ।

‘विपक्षी टिममा राष्ट्रिय टिमका खेलाडीहरु रहेपनि दबाब लिने छैनौं । हामीलाई भन्दा उनीहरुलाई बढी दबाब हुनेछ । हामी हाम्रो आफ्नै रणनीतिमा खेल्नेछौं । टोली मानसिक रुपमा तयार छ । जित्नका लागि खेल्नेछौं । च्यासलविरुद्ध अंक नगुमाउने हाम्रो योजना हुनेछ,’ मछिन्द्रका प्रशिक्षकले भने ।