एजेन्सी – ब्राजिलियन राष्ट्रिय टोलीले अर्जेन्टिना र साउदी अरेबियाविरुद्ध हुने मैत्रीपूर्ण खेलका लागि प्रशिक्षण थालेको छ । सोमबार टोलीले टोटेनहम हट्स्परको मैदानको उपयोग गर्दै प्रस्थान गर्ने अघिल्लो दिन प्रशिक्षण संचालन गर्यो ।

ब्राजिलले रुसमा आयोजित विश्वकप अघि पनि स्पर्सकै प्रशिक्षण मैदान प्रयोग गरेको थियो । राष्ट्रिय टोलीका अधिकांश खेलाडी युरोपमा खेल्ने हुनाले टोलीले ब्राजिल पुग्नभन्दा युरोपमा नै क्लबहरुको प्रशिक्षण मैदान प्रयोग गर्ने चलन रहेको छ । ब्राजिलले विश्वकपमा क्वाटरफाइनल चरण पार गर्न नसकेपनि त्यसपछि मैत्रीपूर्ण खेलमा भने लय समाएको छ ।

पछिल्लो पटक खेलेका दुई मैत्रीपूर्ण खेलमा ब्राजिलले संयुक्त राज्य अमेरिकालाई २-० र एल साल्भाडोरलाई ५-० ले पराजित गरेको थियो । विश्वकपको खराब नतिजालाई भुल्दै ब्राजिलले कोपा अमेरिकालाई ध्यानमा राख्दै तयारी सुरु गरिसकेको छ । ब्राजिल आफैंले कोपा अमेरिकाको अर्को संस्करण आयोजना गर्दैछ । प्रतियोगिता १४ जुन देखि ७ जुलाईसम्म हुनेछ ।

यसअघिका मैत्रीपूर्ण खेलमा नेयमारले दुवै खेलमा गोल गरेका थिए । यद्यपी दुवै गोल पेनाल्टीबाट सम्भव भएका थिए । अर्का फरवार्ड रोबर्टो फिर्मिनोले अमेरिकाविरुद्ध १ गोल गर्दा डेब्यु गरिरहेका रिचार्लीसनले साल्भाडोरविरुद्ध २ गोल गरेका थिए । ब्राजिलको टोलीमा टोटेनहमकै लुकास मौराले पनि स्थान पाएका छन् । उनी २ वर्षपछि टोलीमा फर्किएका हुन् ।

ब्राजिलले मैत्रीपूर्ण खेल अन्तर्गत शुक्रबार साउदी अरेबियाको सामना गर्दैछ । त्यसपछि मंगलबार अर्जेन्टिनाविरुद्धको खेल प्रतिस्पर्धात्मक हुने विश्वास गरिएको छ । ब्राजिलले २३ सदस्यीय टोलीको घोषणा गर्दा घाइते रियल म्याड्रिड डिफेन्डर मार्सेलो भने परेका छैनन् ।

ब्राजिल टोली :

गोलरक्षक – एलिसन, एडरसन, फेलिपे

डिफेन्डर – मिरान्डा, फिलिपे लुइस, मार्किन्होस, ड्यानीलो, स्यानड्रो, फाबिन्हो, मिलिताओ, पाब्लो

मिडफिल्डर – कोउटिन्हो, अगुस्टो, क्यासेमिरो, फ्रेड, आर्थर, वालेस

फरवार्ड – नेयमार, मोउरा, फिर्मिनो, जेसस, रिचार्लीसन, माल्कम