लन्डन (एजेन्सी) – बेल्जियम राष्ट्रिय टोलीका कप्तान एवं चेल्सीका स्टार इडेन हाजार्डले रियल म्याड्रिडबाट खेल्ने उनको बाल्यकालदेखिको सपना रहेको बताएका छन् ।

रियल म्याड्रिडले गत अगस्टमा हाजार्डलाई भित्र्याउने अन्तरिक तयारी गरेको थियो । तर हाजार्डले यस सिजन चेल्सीमै रहने बताएपछि रियल निराश बनेको थियो । हाजार्डले लामो समयदेखि रियल म्याड्रिड आफ्नो बाल्यकालदेखिकै मनपर्ने क्लब रहेको र त्यहाँ खेल्नु आफ्नो सपना रहेको बताएका थिए । तर उनले चेल्सीमा सम्झौता रहुन्जेल अन्य क्लबबारे सोच्न नहुने अभिव्यक्ति दिएपछि ट्रान्सफर हुने सम्भावना कमजोर बनेको थ्यियो ।

जारी लिग सिजनमा ७ गोल गरिसकेका हाजार्डले चेल्सीसँग सम्झौताबारे बोलेका छन् । हाल चलिरहेको सम्झौता अझै दुई वर्ष चल्नेछ । ‘म अब चेल्सीमा नयाँ सम्झौता हस्ताक्षर गर्छु भनेर अन्त्यमा नगर्ने काम गर्न सक्दिन । मैले अब आफूलाई जे राम्रो हुन्छ त्यहि गर्ने हो । क्लबले मलाई धेरै थोक दिएको छ र क्लबलाई पनि राम्रो हुनुपर्छ । यो मेरो जिन्दगिको सबैभन्दा कठिन निर्णय हुनेछ ,’ उनले भने ।

हाजार्डले जारी सिजन उच्च लयमा खेलिरहेका छन् । उनले रियलको प्रशंसा गर्दै विश्वकै उत्कृष्ट क्लब रहेको पनि बताए । ‘म अहिले राम्रो खेलिरहेको छु । रियल विश्वकै उत्कृष्ट क्लब हो । म झुटो बोल्न चाहन्न । मैले बाल्यकालदेखि नै यो क्लबबाट खेल्छु भन्ने सपना देखेको थिएँ,’ उनले भने ।

‘अब हेरौं भविष्यमा के हुन्छ । म हरेक दिन यसबारे बोल्न चाहन्न । मसँग त्यो समय पनि छैन । तर मैले आफ्नो भविष्यबारे निर्णय छिट्टै लिनुपर्छ,’ हाजार्डले थपे । चेल्सीमा लामो समयदेखि खेल्दै आएका हाजार्ड अर्को सिजन रियल जाने सम्भावाना छ । चेल्सीमा सम्झौता अन्त्य नजिकिनु र रियालमा स्टार खेलाडीको अभाव खड्किनुले ट्रान्सफर सफल हुने संकेत दिएको छ ।