म्याड्रिड (एजेन्सी) – बार्सिलोनाले भ्यालेन्सियाविरुद्ध बराबरी खेलेसँगै स्पेनिस ला लिगाको शीर्ष स्थानमा परम्परागत टोली छाडेर नयाँ क्लब आएको छ । विगतमा बार्सिलोना, रियल म्याड्रिड र एटलेटिको म्याड्रिडको दबदबा रहने शीर्षस्थानमा हाल सेभिल्ला रहेको छ ।

आइतबारको खेल सुरु हुनुअघि बार्सिलोना अंक तालिकाको शीर्ष स्थानमा थियो । दिनको पहिलो खेलमा एटलेटिको म्याड्रिडले रियल बेटिसलाई पराजित गर्दै केहि घण्टाको लागि शीर्ष स्थानमा कब्जा जमायो । तर सेभिल्लाले १० खेलाडीमा सिमित सेलता भिगोलाई २-१ ले हराउँदै अंक तालिकाको शीर्ष स्थानमा पुग्यो ।

बार्सिलोनाले जित दर्ता गरेको अवस्थामा स्पष्ट अग्रतासहित शीर्ष स्थानमा रहने सुवर्ण अवसर थियो । तर मेसीको कप्तानीमा रहेको क्याटलान क्लबले जित दर्ता गर्न सकेन । बुधबार च्याम्पियन्स लिगको खेलमा इंग्लिस क्लब टोटेनहम हट्स्परलाई ४-२ ले पराजित गरेपनि घरेलु लिगमा भने बार्सिलोनाले पछिल्ला ४ खेलमा जित दर्ता गर्न सकेको छैन ।

एटलेटिको र सेभिल्लाको सफलताले रियल म्याड्रिडलाई भने असर परेको छ । शनिबार अलाभेससँग १-० ले पराजित भएको रियल अंक तालिकाको चौथो स्थानमा झरेको छ । रियलले पछिल्लो ४ खेलमा कुनै गोल गर्न सकेको छैन र जितविहिन छ । प्रशिक्षक जुलेन लोपेटेगुई निकै दबाबमा आएका छन् । क्रिस्टियानो रोनाल्डोको प्रस्थानसँगै रियलमा गोल गर्ने खेलाडीको कमी भएको भन्ने आलोचकहरुले प्रश्न गर्न थालिसकेका छन् ।

लिग तालिका :

१. सेभिल्ला ८ खेल ५ जित १ बराबर २ हार १६ अंक

२. बार्सिलोना ८ खेल ४ जित ३ बराबर १ हार १५ अंक

३. एटलेटिको म्याड्रिड ८ खेल ४ जित ३ बराबर १ हार १५ अंक

४. रियल म्याड्रिड ८ खेल ४ जित २ बराबर २ हार १४ अंक