साउथह्याम्वटन (एजेन्सी) – इंग्लिस प्रिमियर लिग फुटबलमा लन्डन क्लब चेल्सी र आर्सनलले सहज जित निकालेको छ ।

प्रिमियर लिग अन्तरगत आइतबार राति भएको खेलमा चेल्सीले साउथह्यानम्पटनलाई ३–० ले तथा आर्सनलले फुलहममाथि ५–१ को फराकिलो जित निकाल्यो ।
साउथह्याम्टनको घरेलु मैदानमा भएको खेलमा चेल्सीलाई जित दिलाउन इडेन हाजार्ड, रोज बार्कले र अल्भेरो मोराटाले गोल गरे ।

चेल्सीले खेलको ३०औं मिनेटमा रोजको पासमा हाजार्डको गोलबाट अग्रता बनाएको थियो । पहिलो हाफमा १–० को अग्रता बनाएको चेल्सीले दोस्रो हाफमा दुई गोल गर्न सफल भयो । पहिलो गोलको लागि अवसर सिर्जना गरेका रोजले ५७औं मिनेटमा ओलिभर जिरुको पासमा गोल गर्दै चेल्सीलाई २–० ले अघि बढाएको थियो । ९०औं मिनेटमा वैकल्पिक खेलाडीको मैदान प्रवेश गरेका अल्भेरो मोराटाले हाजार्डको पासमा गोल गर्दै चल्सीलाई ३–० को सहज जित दिलाए । मोराटा ६८औं मिनेटमा जिरुको स्थानमा मैदान प्रवेश गरेका थिए ।

जितपछि चेल्सी ८ खेलबाट २० अंक जोडेर लिगको दोस्रो स्थानमा उक्लिएको छ । समान खेलबाट २० अंक जोडेको म्यानचेस्टर सिटी गोलअन्तरमा चेल्सीभन्दा अघि छ । चेल्सीसँग पराजित साउथह्याम्पटन ५ अंकसहति १६औं स्थानमा छ ।

आइतबार राति नै भएको खेलमा आर्सनलले फुलहममाथि ५–१ को फराकिलो जित निकालेको छ । आर्सनलको सहज जितमा एलेकसान्द्र लाकाजेट्टी र पिएरे हेनरिक आवुमियाङले समान २ तथा आरोन राम्सीले १ गोल गरे । फुलहमका आन्द्रे सरेले गोल गरे ।

जितपछि आर्सनल चौथो स्थान उक्लदा पराजित फुलहम १७औं स्थानमा रहेको छ । आइतबार राति नै भएको खेलमा लिभरपुल र म्यानचेस्टर सिटीले गोलरहित बराबरी खेल्दै अंक बाँडेका छन् ।