काठमाडौं (हाम्रो खेलकुद) – नेपाली राष्ट्रिय फुटबल टोलीले बंगबन्धु कपमा सहभागिता जनाएपछि स्थगित भएको साहिद स्मारक ‘ए’ डिभिजन लिग बुधबारदेखि सुचारु हुने भएको छ ।

बंगबन्धु कपको यात्रा समूह चरणमा नै सिमित भएपछि अखिल नेपाल फुटबल संघ (एन्फा) ले लिगअन्तर्गत पहिलो चरणका बाँकी खेल दशैं अगाडी नै सक्ने निर्णय लिएको हो ।  एन्फा महासचिव इन्द्रमान तुलाधरका अनुसार दशैं अगाडी पहिलो चरणका ५ खेल सकिने छन् । उनले बाँकी स्थगित खेलहरुबारे एन्फा र क्लब बसेर छिट्टै उपयुक्त मिति निकाल्ने पनि जानकारी दिए ।

लिगअन्तर्गत सुरुआती दुई खेल भने असोज १३ र १४ गते नै सम्पन्न भएको थियो । उद्घाटन खेलमा त्रिभुवन आर्मी क्लब र न्युरोड टिम (एनआरटि) बिचको खेल २-२ को बराबरीमा सकिएको थियो ।  उक्त खेलमा आर्मीका लागि सन्तोष तामाङले अन्तिम मिनेटमा इन्डाइरेक्ट फ्रिकिकको मदतले इन्ज्युरी समयको अन्तिम मिनेटमा बराबरी गोल गरेका थिए । त्यसअघि पनि उनले नै आर्मीका लागि पेनाल्टीबाट बराबरी गोल फर्काएक थिए । एनआरटिका लागि रोजित पुडासैनी र राजेश परियारले गोल गरेका थिए ।

दोस्रो खेलमा संकटाले सरस्वति क्लबलाई १-० ले हराएको थियो । अन्तिम मिनेटसम्म गोलरहित बराबरीमा चलेको खेलको इन्ज्युरी समयमा लक्ष्मण रुचालले सुन्दर गोल गर्दै टोलीलाई जित दिलाएका थिए ।  संकटा ३ अंकसहित अंक तालिकाको शीर्ष स्थानमा छ । अब लिग अन्तर्गत बुधबारदेखि ५ खेल हुनेछन् । त्यसपछि भने लिग ५ साताको दशैं-तिहार ब्रेकका लागि फेरी रोकिनेछ ।

पहिलो चरणका बाँकी ५ खेलहरु :

ब्रिगेड ब्वाइज क्लबविरुद्ध मनाङ मर्स्याङदी क्लब

मछिन्द्र क्लबविरुद्ध च्यासल युथ क्लब

फ्रेन्ड्स क्लबविरुद्ध थ्री स्टार क्लब

जावलाखेल युवा क्लबविरुद्ध नेपाल पुलिस क्लब

हिमालयन शेर्पा क्लबविरुद्ध नेपाल एपीएफ क्लब