लन्डन (एजेन्सी)– चेल्सीका सुपरस्टार इडन हाजार्डले प्रिमियर लिगमा यो सिजनको सुरुवातमा आफुलाई लागेका चार उत्कृष्ट खेलाडीको सुचि तयार पारेका छन् । बेल्जियमका सुपर स्टार हाजार्डले मोहम्मद सलाह, केभिन डी ब्रुइने, सर्जियो अगुइरो र एनगोलो कान्टेलाई उत्कृष्ट चार खेलाडीमा राखेका छन् ।

यो सिजन सलाहको सुरुवात सन्तोषजनक हुन सकेको छैन । अघिल्लो सिजन लिभरपुलका लागि सहालले उच्च प्रदर्शन गरका थिए । उनको उच्च प्रदर्शनबाट प्रेरित लिभरपुल च्याम्पियन्स लिग फाइनलमा पुगेको थियो । गत सिजन ४४ गोल गरेका सहालले डी ब्रुइनेलाई पछि पार्दै पिएफए प्लेयर अफ इयर चुनिएका थिए । प्रिमियर लिगमा शीर्ष खेलाडीको नाम लिइरहँदा हाजार्डले आफुलाई त्यो सुचिमा राखेनन् ।

‘अहिलेको क्षणमा म पनि राम्रो गरिरहेको छु, हजार्डले भने, ‘यदि म उत्कृष्ट छैन भने पनि मलाई खास फरक पर्दैन । प्रिमियर लिगका उत्कृष्टका बारेमा हजार्डले भने, धेरै खेलाडी छन् । अगुइरो उत्कृष्ट खेलाडी मध्ये एक हुन् । डी ब्रुएन अहिले चोटग्रस्त छन् । उनी पनि उत्कृष्ट खेलाडी हुन् । सलाह पछिल्लो वर्षका उत्कृष्ट थिए । एन्गोलो पनि त्यस्तै उत्कृष्टमध्ये एक हुन् ।’

हाजार्डले पनि यो सिजन प्रभावशाली सुरुवात गरेका छन् । देश र क्लबका लागि गरि खेलेका ८ खेलमा उनले ८ गोल गरिसकेका छन् । यस सिजन नयाँ प्रशिक्षक सार्रीले हाजार्डलाई आक्रमणमा खुलेर खेल्न दिइरहेका छन् ।