टुरिन (एजेन्सी)– इटालियन क्लब युभेन्ट्स बलात्कारको आरोप लागेका आफ्ना स्टार खेलाडी क्रिस्टियानो रोनाल्डोका पक्षमा उभिएको छ । अमेरिकी मोडलले रोनाल्डोलाई आफुलाई बलात्कार गरेको आरोप लगाएकी छिन् । युभेन्ट्सले सामाजिक सञ्जालमार्फत रोनाल्डोको पक्षमा भनाई राखेको छ ।

३३ वर्षे रोनाल्डोलाई मोडल काथरेन मार्योगाले लास भेगासको होटलमा बलात्कार गरेको आरोप लगाएकी छिन् । त्यो विषयमा नबोल्न त्यसबेला पोर्चुगिज सुपरस्टारले ३ लाख ७५ हजार अमेरिकी डलर समेत दिएको उनको आरोप छ । रोनाल्डोले यो सबै आरोप झुटो भएको दावी पनि गर्दै आएका छन् ।

इटालियन क्लबले रोनाल्डोको पक्षमा ट्विन्ट गर्दै भनेको छ,‘ पछिल्लो समय रोनाल्डोले उच्च व्यावसायिकता र समर्पण देखाएका छन् । युभेन्ट्समा सबैले उनको प्रशंसा गरेका छन् । १० वर्षअघिको विषयलाई अहिले जसरी बाहिर ल्याएको छ, त्यसले हाम्रो धारणामा परिवर्तन आउने छैन ।’

क्लबले उनका पक्षमा खुलेर बोलेपनि उनको प्रायोजक नाइकले भने चासो राखेको छ । नाइकले आजीवन प्रायोजन गरेका तीन खेलाडी मध्ये रोनाल्डो एक हुन् । जसमा बास्केटबलका सुपर स्टारद्वय लेब्रन जेम्स र माइकल जोर्डन छन् ।

‘हाम्रो यसमा गम्भिर चासो छ,’ नाइका प्रवक्ताले भनेका छन्,‘ उनीमाथि लागेको आरोप र अहिलेको अवस्थालाई हामीले हेरिरहेका छौं ।’ रोनाल्डोले भने आफुमाथि लागेको आरोपमा कुनै सत्यता नभएको बताउँदे आएका छन् ।