एजेन्सी – च्याम्पियन्स लिग अन्तर्गत बुधबार ४ समूहका ८ खेल भए । यसक्रममा जितको अपेक्षा गरिएका ठूला टोलीमध्ये कसैले पनि स्तब्ध बन्नु परेन ।

समूह ‘सी’ को खेलमा ब्राजिलियन सुपरस्टार नेयमारले ह्याट्रिक गरेसँगै पेरिस सेन्ट जर्मेन (पीएसजी) ले रेड स्टार बेलग्रेडलाई ६-१ को फराकिलो अन्तरले पराजित गर्यो । पीएसजीको जितमा नेयमारले २ गोल सिधै फ्रिकिकमा गरेका थिए । अन्य गोल किलियन एमबाप्पे, एडिन्सन कभानी र एन्जल डी मारियाको नाममा रहयो ।

त्यसै समूहको अर्को खेलमा नेपोलीले लिभरपुललाई १-० ले हरायो । नेपोलीको जितमा लोरेन्जो इन्सिनेले अन्तिम मिनेटमा गोल गरेका थिए । यस समूहमा नेपोलीको ४ अंक छ भने पीएसजी र लिभरपुलको ३-३ अंक रहेको छ । बेलग्रेड १ अंक जोड्दै अंक तालिकाको पुछारमा छ ।

समूह ‘बी’ को खेलमा बार्सिलोनाले टोटेनहम हट्सपरलाई ४-२ ले पराजित गर्यो । बार्साको जितमा कप्तान लिओनेल मेसीले प्रभावशाली प्रदर्शन गरे । उनले दुई गोल गर्नुका साथै अन्य गोलमा पनि महत्त्वपूर्ण भूमिका खेले । बार्सिलोनाका लागि फिलिपे कोउटिन्हो र इभान राकीटिचले गोल गरेका थिए । स्पर्सका लागि ह्यारी केन र एरिक लामेलाले गोल गरे ।

समूहको अर्को खेलमा इन्टर मिलानले पीएसभीको मैदानमा २-१ को जित दर्ता गर्यो । पाब्लो रोसारियोको गोलमा घरेलु टोलीले अग्रता लिएपनि इन्टरले पहिलो हाफको अन्त्यमा बराबरी गोल फर्कायो । राड्जा नाइनगोलानले ४४ औं मिनेट र माउरो इकार्डीले ६० औं मिनेटमा गोल गर्दै इन्टरलाई जित दिलाए । समूहमा बार्सिलोना र इन्टरको ६-६ अंक छ भने स्पर्स र पीएसभी अंकविहिन छन् ।

समूह ‘ए’ मा एटलेटिको म्याड्रिडले क्लब ब्रुजलाई ३-१ ले पराजित गर्यो । एटलेटिकोको जितमा एन्टोइन ग्रिज्मनले २ तथा कोकेले १ गोल गरे । अर्को खेलमा बोरुसिया डर्टमुन्डले एएस मोनाकोलाई ३-० ले हरायो । बोरुसियाको जितमा जेकाब लार्सन, पाको अल्कासेर र मारको रिउसले १-१ गोल गरे । सुरुआती दुई खेल जितका बोरुसिया र एटलेटिको ६-६ अंकसहित शीर्ष दुई स्थानमा छन् ।

समूह ‘डी’ मा साल्काले लोकोमोटिभ मस्कोलाई १-० ले पराजित गर्यो । ८८ औं मिनेटमा वेस्टन मकेनीले गरको गोल निर्णायक सावित भयो । अर्को खेलमा पोर्टोले गालाटासरेलाई १-० ले नै हरायो । दोस्रो हाफको सुरुआतमा मौसा मरेगाले पोर्टोको लागि विजयी गोल गरेका हुन् । पोर्टो र सल्का ४-४ अंकसहित शीर्ष स्थानमा छन् भने गालाटासरेको ३ अंक छ ।