रियो (एजेन्सी) – स्पेनिस क्लब रियल म्याड्रिडका ब्राजिलियन डिफेन्डर मार्सेलो राष्ट्रिय टोलीबाट बाहिरिएका छन् । चोटका कारण क्लबका पछिल्ला दुई खेल गुमाएका मार्सेलोले राष्ट्रिय टोलीमा पनि उपलब्ध नरहेको जानकारी दिएका हुन् ।

ब्राजिलले अर्को साता हुने मैत्रीपूर्ण खेलमा साउदी अरेबिया र अर्जेन्टिनाको सामना गर्दैछ । मार्सेलोले रियलका पछिल्ला दुई खेलमा सहभागिता जनाएनन् । उनले एटलेटिको म्याड्रिडविरुद्ध गोलरहित बराबरी र मंगलबार भएको च्याम्पियन्स लिगमा सीएसकेए मस्कोविरुद्ध १-० को हारमा विश्राम लिएका थिए । उनको खुट्टाको चोटले गर्दा टोलीमा समावेश हुन नसकेको ब्राजिलियन फुटबल महासंघको वेबसाइटले जनाएको छ ।

ब्राजिलले अक्टोबर १२ तारिखमा साउदी अरेबियाको सामना गर्दैछ । त्यसको ४ दिन पछि अर्जेन्टिना र ब्राजिल आमनेसामने हुनेछन् । प्रशिक्षक टिटेले यस पटक मैत्रीपूर्ण खेलका लागि डिफेन्डर थियागो सिल्भा र विंगरद्वय डग्लस कोस्टा र विलियनलाई टोलीमा समावेश गरेका छैनन् । बार्सिलोनाका युवा विंगर माल्कम भने पहिलो पटक राष्ट्रिय टोलीमा परेका छन् । उनले डेब्यु गर्ने सम्भावना छ ।

रुसमा भएको विश्वकपमा क्वाटरफाइनलमा रोकिएको टोली अहिले युवा खेलाडी समेटेर अर्को वर्ष हुने कोपा अमेरिकाको तयारीमा छ । ब्राजिलले सन् २००७ यता कोपा अमेरिकाको फाइनलमा पनि स्थान बनाउन सकेको छैन । २०१९ जुनमा सुरु हुने प्रतियोगिताको आयोजना ब्राजिल आफैंले गर्दैछ ।