म्यानचेस्टर (एजेन्सी)– इंग्लिस क्लब म्यानचेस्टर युनाइटेका केहि खेलाडीसँग प्रविधिक क्षमता नभएको प्रशिक्षक जोसे मोउरिन्होले बताएका छन् ।

मंगलबार राति भएको च्याम्पियन्स लिगमा भ्योन्सियाविरुद्धको खेलमा गोलरहित बराबरी खेले पछि प्रशिक्षक मोउरिन्होले यस्तो अभिव्यक्ती दिएका हुन् ।  प्रिमियर लिगका ७ खेल खेल्दा युनाइटेडले चार खेलमा जित हासिल गर्न सकेन । लिग तालिकाको १० औं स्थानमा रहेको युनाइटेड तीन खेलमा जित, तीन खेलमा हार र एक खेल बराबरी खेलेको छ ।

पछिल्लो नतिजाले प्रशिक्षक मोउरिन्हो थप दबाबमा आएका छन् । पछिल्लो साता उनी मिडफिल्डर पाउल पोग्बासँग प्रशिक्षण मैदानमा एक स्पष्ट विवादमा आएका थिए । उक्त विवाद मिडियाले समेत भेटेपछि युनाइटेडको समस्या छताछुल्ल भएको हो ।  ‘खेलाडीले कोसिस गरे । उनीहरुले आफ्नो प्रयासको स्तर बढाए,’ प्रशिक्षक मोउरिन्होले भने, ‘आफ्नो तीव्रता पनि बढाएका छन् । हामीले खेल्ने प्रयास गर्यौं । तर, केहि महत्त्वपूर्ण अवस्थामा हामीसँग पछाडीबाट मौका सिर्जना गर्ने प्रविधिक क्षमता भएन ।’

युनाईटेडले सिजनको सुरुआती दिन, अगष्ट १० देखि आफ्नो घरेलु मैदानमा जित निकाल्न सकेको छैन् । शनिबार भएको प्रिमियर लिग खेलमा वेस्ट ह्यामविरुद्ध म्यानचेस्टर युनाइटेड ३–१ ले पराजित भएको थियो । तीन दिन पहिला युनाईटेड काराबाओ कपमा तल्लो श्रेणीको क्लब डर्बीसँग पराजित हुँदै बाहिरिएको थियो ।