इंग्ल्यान्ड (एजेनसी)– म्यानचेस्टर सिटी तथा बेल्जियम राष्ट्रिय टोलीका मिडफिल्डर केभिन डे ब्रुएन प्रशिक्षणमा फर्किएका छन्  । उनी घुँडाको चोटका कारण मैदान बाहिर रहेका थिए ।

प्रारम्भिक परिक्षण अनुसार मिडफिल्डर ब्रुएन तीन महिना मैदान बाहिर रहन सक्ने अनुमान गरिएको थियो । ६ साताअघि उनको दाँया खुट्टको घुँडाको लिगामेन्टमा चोट लागेको थियो । २७ वर्षीय ब्रुएनले चोटका लागि कुनै चिकित्सा शल्यक्रिया भने नलिएको खुलासा भएको छ ।  सिटीले आइतबार प्रिमियर लिगमा लिभरपुलको सामना गर्दै छ । उक्त खेलमा डे ब्रुएन टोलीमा फर्कने अपेक्षा गरिएको छ ।

सोमबार भएको प्रि–म्याच कन्फ्रेन्समा कप्तान भिन्सेन्ट कम्पनिले ब्रुएन सर्वश्रेष्ठ खेलाडी मध्य एक भएको बताएका थिए । बेल्जियमका डिफेन्डर भिन्सेन्टले भने, ‘यो मापन गर्न गाह्रो छ की उनीविना कति नोक्सान भएको छ भनेर । उनी राम्रा मिडफिल्डर हुन् । उनको उपस्थितिले हामीलाई धेरै सहयोग पुग्नेछ, ’ उनले थपे, ‘उनको खेल्ने शैली र प्रभाव निकै ठुलो छ । यद्यपी हामीसँग उनको कमी महसुस हुन नदिन पर्याप्त खेलाडी छन् ।’

सिजनको पहिलो खेलमा आर्सनलविरुद्ध उनी सब्सिच्युटका रुपमा रहेका थिए । उनले २०१७–१८ को सिजनमा सिटीका लागि सबैखाले खेलमा १२ गोल र २१ असिस्ट गरेका थिए । सिटीले गत सिजनको प्रिमियर लिग र इएफएल कप जितेको थियो । रुस विश्वकपमा उनले बेल्जियमलाई तेस्रो स्थान पुर्याउन महत्त्वपूर्ण भुमिका खेलेका थिए । जसले प्रतियोगितामा देशका लागि बसैभन्दो राम्रो प्रदर्शन गरेका थिए ।