म्युनिख (एजेन्सी) – जर्मन च्याम्पियन बायर्न म्युनिख नेदरल्यान्डको आयाक्ससँग बराबरीमा रोकिएको छ । च्याम्पियन्स लिग अन्र्तगतको समूह ‘ईं’ को दोस्रो चरणमा बायर्न आयाक्ससँग १–१ गोलको बराबरीमा रोकिएको हो ।

घरेलु मैदान एलिनाज एरिनामा मंगलबार राति भएको प्रतिस्पर्धात्मक खेलमा बायर्नले खेलमा शुरुवाती अग्रता जोगाउन नसक्दा बराबरीमा रोकिन पुग्यो । बायर्नका म्याट हमेल्स्ले गोल गर्दा आयाक्सका नोउसेर माज्राओइले बराबरी गोल फर्काएका थिए ।

खेलको चौथो मिनेटमा आर्जे रोवनेको पासमा हमेल्स्ले गोल गर्दै घरेलु टोलीलाई १–० को अग्रता दिलाएको थियो । तर, २२औं मिनेटमा माज्राओइले डुसान टाडिकको पासमा बराबरी गोल फर्काएको थियो । त्यसपछि दुवै टोलीले गोल गर्ने प्रयास गरेपनि गोल गर्न नसक्दा खेल १–१ गोलको बराबरीमा टुंगियो ।

बराबरीपछि आयाक्स २ खेलबाट ४ अंक जोडेर समूहको शीर्ष स्थानमा उक्लिएको छ । समान ४ अंक भएपनि म्युनिख गोल अन्तरमा दोस्रो स्थानमा छ ।

यही समूहको अर्काे खेलमा पोर्चुगिज क्लब बेन्फिकाले एइके एथेन्समाथि ३–२ को संघर्षपूर्ण जित निकाल्दै तीन अंक जोड्न सफल भयो । बेन्फिकाका हरिस सेफ्रोभिक, एलेक्स ग्रिमाल्डा, अल्फा सेमेडोले गोल गरे । एइकेका भिक्टोर क्लोनारिडिसले दुवै गोल गरे ।

प्रतिस्पर्धात्मक खेलमा पहिलो हाफमा १० खेलाडीमा समेटिएपनि बेन्फिकाले पहिलो हाफमै २–० को अग्रता बनाएको थियो । पहिलो हाफको इन्जुरी समयमा रुवेन डियासले दोहोरो पहँेलो कार्ड खादै बाहिरिएपछि बेन्फिका १० खेलाडीमा समेटिएको थियो ।

यसको फाइदा एइके एथेन्सले दुई गोल गर्दै उठाउने प्रयास गरेपनि असमर्थ रह्यो । अल्फाले गोल गर्दै बेन्फिकालाई ३–२ को महत्वपूर्ण जित निकाल्यो । जितपछि बेन्फिका ३ अंकसहित तेस्रो स्थानमा उक्लिएको छ । एइके भने अंकविहीन हुदै पुछारमा छ ।

च्याम्पियन्स लिगका अन्य खेलको नतिजा

टिएजी होफेनहेम विरुद्ध म्यानचेस्टर सिटी (१–२)

युभेन्टस् विरुद्ध योङ ब्वाइज (३–०)

लियोन विरुद्ध साख्तर डोनेक्स (२–२)

बायर्न म्युनिख विरुद्ध आयाक्स (१–१)

सिएसकेए मस्को विरुद्ध रियाल म्याड्रिड (१–०)

रोमा विरुद्ध भिक्टोरिया प्लेजेन (५–०)

म्यानचेस्टर युनाइटेड विरुद्ध भ्यालेन्सिया (०–०)