मस्को (एजेन्सी) – साविकको विजेता स्पेनिस क्लब रियाल म्याड्रिड च्याम्पियन्स लिग अन्तर्गतको समूह चरणको दोस्रो खेलमा रुसी क्लब सिएसकेए मस्कोसँग स्तब्ध बनेको छ । रियाल मस्कोसँग १–० ले स्तब्ध बनेको हो ।

मस्कोको घरेलु मैदान लुज्निकी स्टेडियममा मंगलबार राति भएको खेलमा रियाललाई स्तब्ध बनाउन निकोला भ्लासिचले दोस्रो मिनेटमा गरेको गोल नै निर्णायक बनेको थियो । मुख्य खेलाडीहरु ग्यारेथ बेल, मार्सेलो र कप्तान सर्जियो रामोसविनै मैदान उत्रिएको रियाल खेलको दोस्रो मिनेटमा नै पछि परेको थियो ।

रियालका गोलरक्षक केलर नाभास र डिफेन्डर राफेल भरानेबीच तालमेल मिल्न नसकेको फाइदा उठाउँदै मस्कोका निकोला भ्लासिचले डि–बक्सभित्रबाट गरेको प्रहार गोलमा परिणत भएको थियो । खेलमा १–० ले पछि परेपछि रियालले आक्रमक फुटबल खेल्दै गोलको लागि निरन्तर आक्रमण बुनिरह्यो । २९औं मिनेटमा क्यासमिरोको प्रहार क्रसबारमा लागेर फर्किला रियालले बराबरी गर्ने मौका गुमायो ।

४०औं मिेनटमा कप्तान करिम बेन्जेमाको प्रहार पनि बारमा लागेर फर्किएको थियो । दोस्रो हाफमा पनि रियालले मस्कोको पोस्टमा पटकपटक आक्रमण बुनेपनि गोल गर्न सफल हुन सकेन । ९०औं मिनेटमा मारियानो डियाजको प्रहार पनि बारका लागेर फर्कदा रियाल चुक चुकाउदै मस्कोसँग १–० ले स्तब्ध बन्न पुग्यो ।

रियालमाथि मस्कोको यो पहिलो जित हो । यसअघि मस्कोले रियालसँग १ बराबरी र १ खेलमा हार बेहोरेको थियो । खेलमा रियालले ७२ प्रतिशत बल पोजिसन राखेपनि गोल गर्न असमर्थ रह्यो । रियालले मस्कोको चुस्त र बलियो रक्षापङ्ति तोड्न सकेन ।

रियालमाथिको महत्वपूर्ण जितसँगै मस्को दुई खेलबाट ४ अंक जोडेर समूह ‘जी’ को शीर्ष स्थानमा उक्लिएको छ । मस्कोसँगको हारपछि रियाल ३ अंकसहति तालिकामा दोस्रो स्थानमा झरेको छ ।

मंगलबार राति नै भएको अर्काे खेलमा इटालियन क्लब रोमाले भिक्टोरिया प्जेजेनमाथि ५–० को फराकिलो जित दर्ता ग¥यो । रोमाको जितमा इडेन जेकोको ह्याट्रिक पुरा गरे । सेन्जिज अन्डर र जस्टिन क्लुइभर्टले समान १ गोल गरे ।